Mbikalimi i Milotit, i njohur si një nga pikat e zeza të aksidenteve në hartën e rrugëve të Shqipërisë është pastruar nga tabelat dhe objektet e paligjshme.
Dhjetëra aktivitete tregtare të cilat shisnin përgjatë këtij aksi janë prishur.
“Jemi këtu në një nga nyjet e rëndësishme të akseve kombëtare, kryqëzimi i Milotit. Deri më tani, të gjithë personat që kanë kaluar kanë parë që ka patur objekte të paligjshme, aktivitete tregtare të paautorizuara, që shpeshherë mund të kthehen në burim aksidenti.”
Kreu i ministrisë së infrastrukturës tha se pavarësisht se mund të ketë dëme ekonomike për disa subjekte, më e rëndësishme është siguria në rrugë.
“Unë e kuptoj se ka edhe njerëz që preken ekonomikisht, por duhet të kuptojmë se gjeja më e rëndësishme në këto raste është siguria rrugore.”
Autoriteti rrugor dhe Inspektorati i Mbrojtjes së Territorit vazhdojnë aksion për të hequr të gjitha objektet e paligjshme në këto rrugë. Deri tani është pastruar segmenti Tiranë – Shkozet dhe po punohet për të hequr objektet në rrugën Tiranë-Vlorë./Tv Klan
