Kryetari i Partisë Demokratike, Sali Berisha deklaroi se procesi i primareve të mbajtura më 1 Mars ishte procesi më demokratik që Shqipëria ka njohur ndonjëherë.
Gjatë një konferencë për mediat, Berisha tha se kanë ushtruar të drejtën e votës rreth 51 mijë anëtarë të PD-së.
”Duhet të ndalem në dy ngjarje të mëdha për jetën politike të Shqipërisë. Mendoj se primaret që u zhvilluan ditën e dielë në Shqipëri ishin procesi më demokratik që Shqipëria ka njohur ndonjëherë. Në këtë garë të hapur u regjistruan mbi 450 kandidatë. Në këtë garë të hapur morën pjesë qindra e qindra kandidatë. Ushtruan të drejtën e votës rreth 51 mijë anëtarë të PD-së, votimi më i madh që nga viti 2013. Dua me këtë rast të përgëzoj të gjithë ata të cilët morën pjesë në këtë proces. Të përgëzoj kandidatët për guximin dhe vendosmërinë e tyre për të marrë pjesë në garë si përfaqësues të PD në zgjedhjet e ardhshme. Të përgëzoj të gjithë anëtarë të PD që ushtruan të drejtën e votës dhe votuan për kandidatin që ata vlerësojnë më shumë”, shprehet Berisha.
Ndër të tjera, Berisha i kërkoi ndjesë të gjithë atyre që u paraqitën për të votuar dhe nuk votuan dot për shkak të listës ose mungesës së dokumenteve.
“Me këtë rast, duke thënë të gjitha këto, përsëri proces të përsosur nuk ka dhe nuk mund të ketë. Por kërkoj ndjesë të gjithë atyre që u paraqitën për të votuar dhe nuk votuan dot për shkak të listës ose mungesës së dokumenteve. Ju kërkoj shumë ndjesë dhe mendoj se PD do bëjë gjithçka që kjo të mos ndodhë”, shtoi Berisha.
