Aktualitet

Presidenti Meta takim me kryetarin e Komitetit Ushtarak të NATO


               Publikuar në : 12:17 - 23/07/19 |
Al Do

“Do punoj pa u lodhur për një Shqipëri të qëndrueshme, demokratike dhe anëtare të denjë të NATO-s”, i tha Presidenti Ilir Meta kryetarit të Komitetit Ushtarak të NATO-s Marshall Sir Stuart Peach.

Presidenti e priti sot në një takim zyrtarin e lartë dhe e falënderoi për mbështetjen e NATO-s për Shqipërinë dhe i garantoi gjithashtu se bashkëpunimi me Aleancën ka një rëndësi strategjike për sigurinë kombëtare dhe rajonale.

“Shqipëria është një anëtare e NATO-s, e pozicionuar në mënyrë të vendosur në procesin e integrimit europian, duke pritur që të hapë negociatat e pranimit të saj.

Shqiptarët e kanë bërë zgjedhjen e tyre, për t’u bashkuar me NATO-n dhe Bashkimin Europian. Askush nuk mund t’ia ndryshojë rrugëtimin këtij projekti strategjik.

Do punoj pa u lodhur për një Shqipëri të qëndrueshme, demokratike dhe anëtare të denjë të NATO-s, që siç tha Sekretari i Përgjithshëm Stoltenberg gjatë vizitës së Tij në Tiranë, ka në zemër demokracinë”, – u shpreh Kreu i Shtetit.

Presidenti Meta siguroi gjithashtu se Shqipëria do të vijojë kontributet e saj në misionet në Afganistan, Kosovë, Bosnje-Hercegovinë, Mali, Detin Egje, Letoni, Rumani, Mesdhe, etj.

Duke e vlerësuar si legjitime kërkesën e NATO-s për të ndarjen e drejtë të barrës së përgjegjësive, Kreu i Shtetit theksoi se i ka kërkuar Qeverisë, t’u përmbahet angazhimeve zyrtare të Shqipërisë, duke rritur vit pas viti buxhetin deri në 2% të GDP në vitin 2024.

Kreu i Shtetit shprehu mbështetjen e Tij ndaj përpjekjeve të qeverisë së Kosovës, për integrimin në NATO dhe ngritjen e Forcave të Armatosura si “kontribut shtesë për sigurinë dhe stabilitetin  afatgjatë të rajonit”.

Kryetari i Komitetit Ushtarak është një nga zyrtarët më të rëndësishëm të NATO-s, së bashku me Sekretarin e Përgjithshëm dhe Komandantin Suprem të Forcave Aleate të Europës. /Opinion.al

Pas