Italia, kampionia në fuqi e Europës, është e fortë dhe këtë e di mirë ai, por presidenti i Federatës Shqiptare të Futbollit, Armand Duka, e ëndërron një triumf.
Pjesëmarrja në Euro 2024, është një sukses i madh për kuqezinjtë, por ata tani kërkojnë një arritje të madhe, të mposhtin të kaltrit.
Për kreun e FSHF të luash ndaj një vendi mik është diçka speciale.
“Të sfidosh kampionët e Europës është tërheqëse dhe stimuluese, por edhe e vështirë sepse e dimë forcën e tyre. Objektivi është që të japim maksimumin për tifozët tanë që do të jenë në stadium dhe para televizionit.”
Zv/presidenti i UEFA-s nuk mendon se të kaltrit e kanë humbur cilësinë e dikurshme.
“Unë mendoj se Spalletti ka shumë futbollistë me cilësi si Barella, Frattesi, Chiesa, Scamacca e Donnarumma. Ata mund të vendosin ndeshjen në çdo moment me një rast. Uroj që kjo të jetë një ndeshje e bukur dhe emocionuese! Pa dyshim që Italia është favorite, por djemtë janë mirë dhe do të tentojmë të fitojmë, të befasojmë të kaltrit!”
Pavarësisht se rivalët janë kombëtare mjaft cilësore si Spanja, Kroacia e Italia, presidenti Duka e ka një shpresë.
“Të tre skuadrat e grupit janë ndër më të mirat e Europës dhe mund të provojnë ta fitojnë kompeticionin. Nëse një i’a del, nuk do të ishte surprizë. E pastaj jemi ne që do t’i sfidojmë me krenari të madhe dhe besim në aftësitë tona. Jam i bindur se mund të arrijmë në 1/8-at, e madje të shkojmë më tej.”
Presidenti i FSHF kujton edhe kontributin që trajnerët italianë De Biasi, Panuçi e Reja kanë dhënë për kombëtaren kuqezi.
Klan News
