Ministri i Brendshëm Fatmir Xhafaj ka deklaruar se së shpejti Policia e Shtetit do të japë rezultatet e para në luftën kundër krimit dhe goditjen e grupeve kriminale.
Gjatë prezantimit të objektivave për 100 ditët e para të qeverisë në Asamblenë e PS, Xhafaj theksoi se muajt në vijim do ketë rezultate konkrete, duke i dhënë kështu përgjigje akuzave në lidhje me situatën e kriminalitetit në vend.
“Në muajt në vijim ne do të flasim për drejtësinë në veprim, për autoritetin real të shtetit dhe luftën kundër krimit dhe grupeve kriminale”, theksoi Xhafaj.
Ministri i Brendshëm akuzoi edhe opozitën, duke thënë se kur ishin në qeveri e “kishin kthyer krimin në bashkëjetesë me drejtësinë”.
Xhafaj foli gjithashtu dhe për luftën kundër kultivimit të kanabis sativës. Sikurse u shpreh ai, ditët në vijim do të dalë një raport i partnerëve ndërkombëtarë për këtë fenomen.
