Kreu i grupit të këshilltarëve të LSI-së në Fier, Nimet Musaj ka dhënë dorëheqjen nga kjo detyrë, pasi pranoi mandatin e deputetit. Në mbledhjen e sotme, Musaj ka thënë se edhe në Kuvend do të jetë i njëjti person, duke nënkuptuar se do të jetë në opozitë me qeverinë.
Nimet Musaj ishte i katërti në listën e Fierit dhe do të marrë mandatin që refuzoi Erisa Xhixho. Ai dërgoi në KQZ formualarin e dekriminalizimit javën e kaluar.
Nimet Musaj ka lindur më 29 janar 1960 në Patos, ndërsa edhe më parë ka qenë kandidat për deputet në qarkun e Fierit për PDI-në. Ai ka kaluar nga partia çame e PDIU-së ku ka aderuar deri në vitin 2015, në Lëvizjen Socialiste për Integrim, ku u rendit i katërti në listën e Fierit për zgjedhjet e vitit 2017.
Për sa i përket arsimimit, ai deklaron se ka mbaruar shkollën e mesme të përgjithshme dhe te mesmen mekanike në Patos në vitin 1982, ndërsa universitetin e ka kryer në vitet 2005-2009 në Vlorë, ku ka studiuar për Administrim Biznesi./Opinion.al
