Kreu i Ballit Kombëtar, Adriatik Alimadhi, është një tjetër kandidat që pranoi të bëhet pjesë e Parlamentit pas djegies së mandateve të opozitës.
Përveç faktit që doli kundër vendimit të opozitës, Alimadhi në një intervistë për mediat shprehet se është kundër protestave ndaj qeverisë Rama. Ai e argumenton qëndrimin e tij duke thënë se Shqipëria është një vend i cili aspiron futjen në Bashkimin Europian dhe se protestat e opozitës janë të nxituara.
“Ne duhet të sillemi si qytetar të cilët pretendojnë të futen në BE. Protesta e opozitës është një veprim i nxituar. Unë jam mësuar të sillem si nacionalist. Unë mund të jem patrioti i fundit por kur të bëjnë një marrëveshje me mua dhe Ballin Kombëtar duhet të japim besën. Unë dua që PD të jetë e shëndetëshme dhe me program të qartë. Ndërkohë që unë mendoj se LSI shkon herë andej herë këtej por boshti moral i politikës së qenësishme duhet të ketë një shtrat që të gjithë shqiptarët ta besojnë
Unë jam shumë i lumtur që kam marrë mandatin dhe ky është i ballistëve vlonjat. Jam në gjendje ti përfaqësoj denjësisht pavarësisht situatave politike. Në lidhje me qeverinë nuk më lidh asgjë. Mua më kanë internuar dhe dëbuar në moshën 4 vjeçare, kjo domethënë nuk më lidh asgjë. Për mua sot është ish-partia kriminale e punës duke qeverisur vendin. Adriatik Alimadhi është me bindje të qarta atdhetare dhe patriotike, askush nuk ka të drejtën të luaj me mua. Mua dhe Ballin Kombëtar nuk e lidh asgjë me qeverinë”, tha Alimadhi.
Kujtojmë që, Alimadhi ishte i shtati në listën e Partisë Demokratike në Qarkun e Vlorës në zgjedhjet e përgjithshme të vitit 2017./ Opinion.al E.Xh.
