Në të parin vit të zbatimit të ligjit për arsimin e lartë, i cili u la dorë të lirë universiteteve të përzgjidhnin studentët, rezultojnë që këto të fundit të mos kenë rekrutuar më të mirët.
Kjo mund të thuhet me siguri për Fakultetin Ekonomik. Të dhënat e raportuara nga ky i fundit tregojnë që këtë vit zhvendosja e fundit e vizës së kuqe ka futur në një nga degët më të pëlqyera edhe maturantë me mesatare gjashtë. Konkretisht, fituesi i fundit në degën Ekonomiks ka pasur një mesatare aritmetike të tri viteve të gjimnazit 6.08, shumë pranë pragut të vendosur nga Këshilli i Ministrave si kusht për të vijuar studimet e larta. Fituesit e fundit në Administrim Biznes, Financë e Informatikë Ekonomike janë me një mesatare pak më të lartë, por gjithsesi s’e kalojnë notën 7.
Jo më larg se një vit më parë, një maturanti i janë dashur mbi 6 mijë pikë që të bëhet pjesë e Ekonomikut, ndërsa nota mesatare e fituesit të fundit luhatet mes 9.2 dhe 9.9. Trendi i cilësisë në zbritje vlen edhe për ekselentët e renditur në krye të listave të fituesve. Ndërsa vjet flitej për mesatare aritmetike mbi notën 10, këtë vit mezi i afrohet. Paradoksi i krijuar me formulat e reja të pranimeve pritet të përmirë sohet me shpalljen e kritereve të reja. I vetmi universitet që shmangu këtë ishte Universiteti i Mjekësisë, i cili që në krye të herës vendosi një prag hyrjeje me notë mesatare jo më të ulët se 8.
PRANIMET TEK MJEKESIA
Pas një viti të shumëdiskutuar pranimesh në arsimin e lartë, vëmendja është kthyer tek ato të vitit të ardhshëm, 20172018. Teksa të gjithë universitetet po punojnë për hartimin e një formule të re, ai i Mjekësisë e ka zgjidhur me kohë. Vendimit të senatit për kriteret e pranimit të studentëve në ciklin e parë, datë 21.07.2016, nuk do t’i hiqet asnjë presje. Këtë e konfirmon për gazetën rektori i universitetit, Arben Gjata. “Për këtë vit, fakultetet kanë propozuar të ruajmë formulën e vjetshme, kështu që parimisht jemi dakord të vazhdojmë me të njëjtat kritere. Kjo, përforcuar edhe nga fakti se nuk kemi pasur shumë ankesa për pranimet e këtij viti”.
Javën e ardhshme, UM do të mbledhë senatin akademik për t’i dhënë formë përfundimtare formulës së amenduar në krye të herës. Pesha e vlerësimit të maturantëve në garë për të fituar një nga degët e mjekësisë ndahet midis notës mesatare të provimeve të fundit, mesatares së tri viteve gjimnaz dhe lëndëve formuese: Kimi, Biologji e Fizikë. Ndërsa kusht për të garuar në një nga degët e Mjekësisë do të vijojë të jetë nota tetë për: Logopedi, Mami, Infermieri, Fizioterapi, teknik laboratori e imazheri, ndërsa tri degët më të kërkuara; Mjekësi, Farmaci e Stomatologji kanë një prag më të lartë hyrjeje, notën mesatare 8.5. Kjo është forma përfundimtare e vendimit të ndryshuar tri herë./Panorama
