Raporteri i grupit parlamentar CDU/CSU për Shqipërinë Christian Schmidt, ka zhvilluar një sërë takimesh me zyrtarë më të lartë të politikës shqiptare.
Schmidt, në një intervistë për “Vizion Plus”, ka folur në lidhje me krizën politike që ka përfshirë vendin.
Raporteri i grupit parlamentar CDU/CSU për Shqipërinë, theksoi se ngërçi politik duhet të zgjidhet nga vetë shqiptarët.
Gjithashtu, ai tha se Shqipëria duhet të sigurojë demokracinë në vend, si dhe zgjedhje të lira e të ndershme për të avancuar integrimin drejt Bashkimit Europian.
Ka deputetë të opozitës në Shqipëri që kanë dorëzuar mandatin e tyre. Kjo ide ka ardhur nga partia më e madhe e opozitës, Partia Demokratike. SHBA dhe Bashkimi Evropian në Bruksel kritikuan dorëzimin e mandateve nga opozita. Cili është qëndrimi juaj për këtë?
Raporteri i CDU, Christian Schmidt: Që të funksionojë një demokraci duhet edhe Qeveria, edhe opozita. Duhet që të gjithë të kenë një mundësi reale për të shpalosur publikisht qëndrimet e tyre. Fatkeqësisht, jo vetëm nga pikëpamja e opozitës, shikohet me shqetësim se kjo mundësi nuk ekziston në Shqipëri. Nuk duhet t’ia hedhim fajin vetëm opozitës pse ajo mori një hap ekstrem. Të gjithë kanë pjesën e tyre, në mënyrë të veçantë qeveria. Natyrisht, në fund të fundit, duhet të kemi një parlament të plotë, të aftë për të punuar dhe për të marrë vendime. Jam i shqetësuar, sepse kultura e vlerave që bashkojnë forcat demokratike, dukshëm, është dëmtuar rëndë.
A ka një propozim për zgjidhjen e krizës politike në Shqipëri nga Gjermania apo grupi I CDU/CSU?
Raporteri i CDU, Christian Schmidt: Problemet në Shqipëri para së gjithash duhet të zgjidhen nga shqiptarët. Kjo përfshin përmbushjen në mënyrë të besueshme të kritereve të BE për sundimin e shtetit ligjor. Gjermania është një partner konstruktiv dhe i përkushtuar për këtë gjë. Nëse dëshironi të anëtarësoheni në Bashkimin Evropian, ju duhet të pranoni rregullat e Shtëpisë Evropiane. Kjo përfshin sigurimin e zgjedhjeve të lira e te ndershme. Prandaj, unë pres që gjetjet e prokurorisë për manipulimin e zgjedhjeve të hetohen dhe autorët të dënohen. Gur prove për këtë do të jenë zgjedhjet lokale në qershor. Përsa I përket politikës së jashtme, jam i shqetësuar për shprehjen, në mënyrë të përsëritur, të ideve për një “Shqipëri të Madhe”. Unë rekomandoj që kjo të ndalojë. Kam shpresë se, së bashku, këtë vend të rëndësishëm të Europës Juglindore, ta drejtojmë në rrugën europiane./ Opinion.al E.Xh.
