Liderët e partive kryesore në vend kanë uruar kombin shqiptar me rastin e 111 vjetorit të Pavarësisë së Shqipërisë.
Kryeministri Edi Rama ka zgjedhur foton e një vajze të vogël të veshur me kostum tradicional, e cila prek flamurin kombëtar për të uruar shqiptarët.
Sakaq, Ish-kryeministri Sali Berisha, ka postuar në X një fragment të këngës “Rrjedh në këngë e ligjërime” të Vaçe Zelës me urimin “Gëzuar miq, ditën e Flamurit”.
Ndërkohë, kreu i Partisë së Lirisë, Ilir Meta shkruan krah fotos së tij teksa bën homazhe në monumentin e vendosur në Vlorë për të shënuar këtë ditë se “Flamuri Kombëtar është simboli që bashkon të gjithë shqiptarët nga Skënderbeu te Adem Jashari”.
“Gëzuar Ditën e Flamurit Kombëtar, simbolit që bashkon të gjithë shqiptarët, Gjergj Kastrioti Skënderbeun dhe Ismail Qemalin, Isa Boletinin dhe Adem Jasharin! Nderimin më të thellë për Atin e Shqipërisë, themeluesin e shtetit tonë modern, Ismail Bej Vlorës dhe veprës së ndritur të shumë patriotëve të tjerë që përjetësuan 28 Nëntorin e vitit 1912! Gëzuar Pavarësinë e Shqipërisë”, shkruan Ilir Meta.
Në këtë ditë të veçantë nuk ka munguar as urimi i kryebashkiakut të Tiranës, Erion Veliaj.
Ai ka zgjedhur një video të veçantë urimi me fëmijët e qytetit, ku citon se “sa të bekuar jemi që jetojmë në këto toka”.
“Gëzuar 111-vjetorin e Pavarësisë – Gëzuar Ditën e Flamurit Shqipëri. Flamujt shqiptarë që valëviten sot na kujtojnë sa të bekuar jemi që jetojmë në këto toka”, shkruan Veliaj në rrjetet sociale.
