Policia ka ndaluar një adoleshent si shkaktar të djegies së pyllit në Vorë. Zjarri po vazhdon ende prej dy ditësh megjithë ndërhyrjen e zjarrfikëseve për ta shuar.
Në një komunikim për mediat, policia tha se autori I zjarrvënies në fshatin Kuç është 16 vjeçari me iniciale R.L. banues në fshatin Gjokaj (Bashkia Vorë), i proceduar më parë për veprën penale “Prerje e paligjshme e pyjeve”, neni 205 i Kodit Penal.
Ndalimi i këtij shtetasi është bërë i mundur, pasi më datë 09.08.2017, rreth orës 19: 00, në kodrat e fshatit Kuç, ky shtetas ka shkaktuar rënien e zjarrit në sajë të një cigareje të hedhur në tokë, ku për pasojë janë djegur mbi 5 hektar bimësi (shkurre dhe ullinj).
Shërbimet e Policisë në bashkëpunim me PMNSZH dhe Emergjencat Civile vazhdojnë punën për fikjen e zjarrit i cili vazhdon prej 2 ditësh.
Materialet iu referuan Prokurorisë së Rrethit Gjyqësor Tiranë, për veprime të mëtejshme në ngarkim të shtetasit të lartëpërmemdur për veprën penale “Shkatërrim nga pakujdesia me zjarr i pyjeve dhe i mjedisit pyjor, parashikur nga neni 206 / b i Kodit Penal.
