Një gomone e përmasave të mëdha e cila ishte e ngarkuar me kanabis, është kapur nga policia në det teksa ishte e përfshirë nga flakët. Policia Kufitare e ka ndaluar gomonen në orët e para të mëngjesit në fshatin Rrjoll të Velipojës, në afërsi të “Rërës së Hedhur”.
Trafikantët që kanë lënë gomonen duke u djegur janë larguar në rrugë tokësore.
Dyshohet se trafikantët e kanë kuptuar se janë diktuar nga policia dhe kanë devijuar rrugën dhe më pas i kanë vënë vetë flakën gomones me kanabis.
Policia ende nuk ka dhënë një informacion zyrtar për ngjarjen, por burime konfidenciale bëjnë të ditur se në gomone ka pasur lëndë narkotike kanabis dhe trafikantët dyshohet të kenë qenë dy persona që janë larguar në këmbë.
Policia ka sekuestruar një sasi të lëndës narkotike dhe gomonen e djegur në cilësinë e provës materiale dhe është duke punuar për identifikimin dhe kapjen e autorëve.
