Policia ka hedhur gaz lotsjellës për të shpërndarë protestuesit jashtë Parlamentit të dielën, pasi mijëra qytetarë grekë u mboldhën në Athinë për të protestuar kundër një marrëveshjeje me Maqedoninë.
Qendra e Athinës u shndërrua në një det njerëzish që mbanin në duar flamuj grek dhe parulla, ku shumë prej tyre kishin ardhur nga mbarë vendi për të protestuar kundër marrëveshjes së emërtimit të shtetit ish-Jugosllav si Maqedonia Veriore.
Shumë grekë besojnë se emri Maqedoni, nënkupton një pretendim territorial mbi rajonin e tyre verior.
Çështja ngjall emocione të forta mes grekëve, të cilët e konsiderojnë Maqedoninë, mbretërinë e lashtë të sunduar nga Aleksandri i Madh, dhe ku duhet të jetë pjesë përbërëse e atdheut dhe trashëgimisë së tyre.
Marrëveshja e nënshkruar nga dy qeveritë, zhbllokon dëshirën e Maqedonisë për t’iu bashkuar NATO-s dhe Bashkimit Europian, por pasi të ratifikohet nga parlamenti i Greqisë.
“Ne nuk mund t’a kapërdijmë këtë marrëveshje. Nuk e japim Maqedoninë tonë, historinë tonë”, – u shpreh për mediat Amalia Savrami, 67-vjeçe, ndërsa tundnte një flamur të madh grek në Sheshin Sintagma të Athinës.
“Maqedonia është greke”
Mediat vendore raportuan se protesta e të dielës ishte një nga më të mëdhatë gjatë dekadës së fundit, duke dominuar qartaz ndaj tubimeve të mëparshme.
Maqedonia e shpalli pavarësinë në vitin 1991, duke shmangur dhunën që u pasua në shumë vende gjatë shpërbërjes së ish-Jugosllavisë.
Kryeministri Zoran Zaev ka kërkuar që marrëveshja të përshpejtohet që vendi t’i bashkohet sa më parë NATO-s dhe BE-së.
Greqia kishte rënë dakord që deri në zgjidhjen e mosmarrëveshjes së emrit, fqinji i saj verior, me një popullsi prej rreth 2 milionë banorësh, mund të emërtohej ndërkombëtarisht si “IRJM” – Ish Republika Jugosllave e Maqedonisë. Ky është emri me të cilin u pranua në Kombet e Bashkuara më 1993.
Zgjidhja e emrit të Maqedonisë, do të përshëndetet si një sukses i kryeministrit grek Alexis Tsipras. Ai fitoi një mocion besimi këtë muaj, pasi Grekët e Pavarur u tërhoqën nga koalicioni qeveritar.
Siç duket, marrëveshja me Shkupin kishte tensionuar marrëdhëniet me partinë e krahut të djathtë, aleatin e tij të koalicionit, i cili kundërshtoi përdorimin e emrit “Maqedoni” në çdo zgjidhje të pranuar nga palët./Rel.d/
