Fatmir H. 36 vjeç, shqiptar nga Kosova është autori i sulmit me sëpatë në stacionin e trenit në Dyseldorf të Gjermanisë. Policia ka arritur ta kapë autorin i cili është shtruar në spital pasi ka thyer gjymtyrët. Ai kishte hyrë në Gjermani në vitin 2009 dhe jetonte në Wuppertal.
Në konferencë për mediat policia tha se gjatë kontrollit në banesë atij iu gjetën medikamente të ndryshme që përdoren për paranoja dhe skizofreni.
“Sipas të gjitha gjasave fjala është për një sulmues të vetëm, një person paranojak, të cilit i janë gjetur medikamente në banesë”, bëri të ditur policia.
Gjithashtu, autori i dyshuar i sulmit, momentalisht gjendet në sallën e operacionit pasi në largim e sipër nga vendi i ngjarjes ka kërcyer nga një urë dhe ka thyer gjymtyrët.
Ndër 9 personat e plagosur, tre prej tyre kanë marrë lëndime në kokë, pasi janë sulmuar nga mbrapa me sëpatë. Policia tregon se një nga të lënduarit është 13-vjeç dhe një 30-vjeç.
“Të lënduar janë gjithsej 9 persona; katër gra dhe pesë burra”, thotë policia gjermane, duke shtuar se sulmuesi ka vepruar i vetëm.
Ai ka tentuar të futet në një nga trenat, por fatmirësisht nuk ka ndodhur pasi mund të kishte më shumë viktima. /Opinion.al
