Deputeti demokrat, Ervin Salianji, e ka cilësuar diskutimin në Komisionin e Sigurisë për lidhjen e një marrëveshje midis Shqipërisë dhe Bashkimit Evropian për vendosjen e policëve të huaj në kufi, si “de facto” rikthimin e regjimit të vizave.
Salianji shkruan në postim se kjo ndodh pasi qeveria provohet si e paaftë dhe e pabesueshme me partnerët. Dhe kjo vjen sipas tij për shkak të qindra tonelatave me drogë që kalojnë nga Shqipëria si vend tranzit, çka ka detyruar BE-në të sjellë një agjenci policore për të kontrolluar kufirin.
Por nuk është e këtij mendimi kryetarja e Komisionit të Sigurisë, Ermonela Felaj.
Në një prononcim për Opinion.al, Felaj thotë se marrëveshja nuk ka lidhje me asnjë nga pretendimet që ngre z. Salianji në postimin e tij.
“Ç’ të them për dikë që s’lexon dhe më e keqja s’ kupton atë që lexon? !
S’ kanë lidhje këto fare me marrëveshjen. Shqipëria po bëhet pjesë e kesaj marrëveshje si shumica e vendeve të BE-së dhe hapësirës Shengen, qëllimi është menaxhimi i flukseve migratore me kapacitete njerëzore dhe teknike të përbashkëta. Çdo aludim tjetër është genjështër e pastër”, deklaroi Felaj.
Më poshtë postimi i plotë i deputetit demokrat Salianji
“Komisioni i Sigurisë diskutoi marrëveshjen ndërmjet BE dhe Republikës së Shqipërisë për kontrollin e kufirit!
1.Qeveria tashmë edhe zyrtarisht provohet si e paaftë dhe e pabesueshme për partnerët. Qindra tonelata me drogë dhe përdorimi i Shqipërisë si vendi kryesor për tranzitin e kokainës dhe heroinës detyron BE të sjellë agjensi policore të BE për të kontrolluar kufirin.
2-Shqipëria është vendi i parë dhe i vetëm në Rajon që detyrohet me shpejtësi për marreveshjen. Lajmi i keq që Shqipëria i ka institucionet e saj të pabesueshme per partnerët dhe kjo marreveshje konfirmon qe kufijte i menaxhon krimi dhe jo policia, lajmi i mirë është që BE po sjell trupa të specializuar për kontrollin e kufirit.
3-Marrëveshja është paralajmërim për institucionet shqiptare dhe fatkeqësisht është paralajmërim për rikthimin e vizave.
BE merr praktikisht në kontroll edhe kontrollin e personave!
Marrëveshja çertifikon qendrimet e opozitës dhe mediave për humbjen e kontrollit të qeverisë në territor, për kontrollin e territorrit dhe kufijve nga krimi.
Marrëveshja është kërkuar nga BE si rast urgjence.”/ D.L
