Dy ngjarje të rëndë janë shënuar në Mat, gjatë mbrëmjes së djeshme dhe mëngjesit të sotëm. Deri më tani policia nuk ka gjetur lidhje mes këtyre dy ngjarjeve.
Kështu raportohet se sot në mëngjes, rreth orës 09:00 në lagjen “Partizani” të qytetit të Burrelit në katin e 5-të një pallati, është gjetur një pako e dyshimtë. Policia ka konstatuar se bëhet fjalë për 200 gr tritol që është vendosur në banesën e shtetasit A.C, 56 vjeç. Është kryer çaktivizimi i tritolit dhe po hetohet për autorët dhe konfliktet e kësaj familje. Siç shihet dhe në foto, kjo familje kishte izoluar hyrjen e saj në pallat me zgarë hekuri, ç’ka të bën të mendon se ruheshin, apo kishin frikë.
*Foto nga apartamenti ku u vendos tritoli
Ngjarja tjetër e rëndë ka ndodhur mbrëmjen e së hënës, rreth orës 21:00 në fshatin Komsi-Mat. Është qëlluar me armë zjarri në drejtim të banesës së Kryeplakut të fshatit Komsi, i cili punonte dhe pranë fabrikës së “Ferrokromit Burrel”.
“Në drejtim të banesës është qëlluar me armë zjarri automatik nga një distancë rreth 50 m, ku në njërën nga dhomat e banesës është thyer xhami i jashtëm i dritares, dhe në pjesën e jashtme të banesës ka disa vrima të shkaktuara nga predhat. Grupi hetimor ka mbledhur dhe sekuestruar në vendngjarje 15 gëzhoja”, tha policia.
Nga të shtënat me armë nuk ka persona të lënduar. Policia tha se autori është A.GJ, 26 vjeç me precedent të mëparshëm kriminal i cili është shpallur në kërkim. Paraprakisht dyshohet se shkaku është për motive të dobëta. /Opinion.al
*foto nga shtëpia që u qëllua me automatik
