Në spitalin rajonal të Durrësit sot (e martë) janë anuluar të gjitha operacionet e planifikuara. Burime konfidenciale nga ky spital thanë për Opinion.al se shkak është bërë mungesa e materialeve mjekësore dhe medikamenteve. Pra, thënë më qartë nuk ka narkozë, s’ka preparate, materiale të buta, etj. Me dhjetëra pacientë që janë të shtruar nëpër pavione nuk mund tu nënshtrohen ndërhyrjeve kirurgjikale, deri në një urdhër të dytë nga drejtoria.
Opinion.al kontaktoi me drejtorin e Spitalit rajonal të Durrësit, Alban Ramohitaj, i cili mohoi të ketë mungesa me medikamente në spital. “Ne po vazhdojmë punën normalisht me ndërhyrjet kirurgjiikale të planifikuara”, tha ai. “Kishim para disa ditësh ndërprerje për shkak të të ftohtit dhe gripit, por tani jemi kthyer në normalitet”, vijoi drejtori. Insistimit tonë se ka ankesa të drejtura në media për anuliminin e operacioneve, Ramohitaj u përgjigj se “në mënyrë kategorike nuk ka asnjë anulim”.
*Drejtori Alban Ramohitaj
Ky shqetësim i ngritur për anuliminin e operacioneve vjen vetëm një ditë pasi ministri i Shëndetësisë, Ilir Beqaj foli nga Durrësi për proteza falas apo për dhjetëra shërbime që sipas tij janë përmirësuar.
Në fakt në Durrës ishte Kryeministri Edi Rama bashkë me ministrin dhe zyrtarë të tjerë. Ata mbajtën fjalime nga auditoret e Universitetit të Durrësit, të cilat u transmetuan në TV përmes regjisë qendore të Kryeminisitrisë. Si Rama ashtu edhe Beqja e vunë theksin tek mbulimi universal dhe shëndetësia falas. “Nga janari 2017 barnat me rimbursim mund t’i marrë kushdo kur mjeku i familjes i përshkruan ato. Pra edhe ata që nuk janë të siguruar marrin barna me ribursim falas”, tha ministri Beqaj.
Më pas ai foli edhe për kartën e shëndetit online dhe për recetën online, por nuk e dimë nëse Beqaj u fut në spitalin e Durrësit për të takuar mjekët dhe stafin? A u njoh ai me shqetësimet reale të mjekëve dhe pacientëve? / Opinion.al
Rama dje (e hene) duke folur per shendetesine ne Durres
