Në një konferencë për mediat të zhvilluar pas takimit mes Ballkanit Perëndimor dhe BE-së në lidhje me Planin e Rritjes së Komisionit Europian për rajonin tone, kryeministri Rama u shpreh se vendi që do të mundohet të bllokojë tjetrin në këtë proces do të penalizojë veten sepse nuk do të përfitojë asgjë nga ky plan.
“Kishte një atmosferë shumë pozitive sepse u bë gjëja e duhur, u fol për punë konkrete, u fol për temat e kësaj sfide shumë të madhe që është përfitimi me sukses i të gjithë vendeve të rajonit nga plani i ri i rritjes së Bashkimit Europian dhe nga mundësia e integrimit në tregun e përbashkët europian, gjëra për të cilat është shumë e qartë dhe është bërë fare e qartë gjatë darkës së djeshme dhe drekës së sotme nga përfaqësuesi i lartë i Komisionit Europian, por edhe përfaqësuesi i administratës amerikane se në këtë proces nuk ka asnjë hapësirë dhe njëkohësisht patjetër nuk ka asnjë dëshirë për të dëgjuar çështje të natyrës politike, çështje të natyrës bilaterale, përkundrazi është shumë e qartë që çdo vend që do të bllokojë tjetrin në këtë proces do të bllokoj vetveten dhe nuk do të përfitojë dot nga ky plan”, u shpreh Rama.
Kreu i qeverisë theksoi se e rëndësishme në këtë plan është integrimi në tregun e përbashkët europian.
“Shumë herët për të folur për këto. Është e rëndësishme të kuptohet se pjesa më e rëndësishme e këtij procesi nuk janë miliardat, janë shumë patjetër të rëndësishme për ne, por është integrimi në tregun e brendshëm europian. Për shembull në integrimin në tregun e përbashkët vetëm nga ndryshimi i regjimit i tansaksioneve që bëjnë qytetarët parashikohet që qytetarët shqiptarë do të mund të kursejnë mbi 20 mln Euro në vit”, tha ai.
