Ditën e sotme kontrollorët e AlbControl në Aeroportin e Rinasit vendosën të bënin një grevë duke bojkotuar punën në shenjë proteste për pagat dhe kushtet e punës.
Kjo ka shkaktuar avari në uljen dhe ngritjen e avionëve duke bërë të mundur që fluturimet Athinë-Tiranë dhe Stamboll- Tiranë të pezulloheshin.
Kjo situatë ka bërë që Ministrja e Infrastrukturës Belinda Balluku të shkonte në aeroport dhe të fliste personalisht me kontrollorët për zgjidhjen e këtij ngërçi.
Duket se takimi mes dy palëve ka dështuar duke mos çuar në asnjë dakordësi e marrëveshje.
Në një prononcim për mediat një zonjë e cila ishte pjesë e stafit të kontrollorëve është shprehur se ishte e pushuar nga puna teksa kërkonin ndër të tjera rikthimin në punë të kontrollorëve të pushuar dje.
Në një letër njoftimi për mediat Sindikata e Pavarur e Kontrollit të Trafikut Ajror (SPKTA) thotë se ekziston rreziku i pamundësisë së garantimit të sigurisë së fluturimeve ajrore mbi dhe në Republikën e Shqipërisë, dhe rreziku i mbylljes përfundimtare të saj për një periudhë kohore të papërcaktuar.
AlbControl është një kompani me kapital 100% shtetëror dhe në varësi të Ministrisë së Infrastrukturës.
Kërkesat e kontrollorëve:
– Rikthim i kolegëve në punë;
– Shfuqizim i vendimeve të bordit;
– Rikthimi i pagës së plotë sipas kontratës kolektive;
– Transparencë financiare e plotë për vitin 2020;
– Një anëtar sindikate të jetë anëtarë bordi.
Kjo është hera e parë që ndodh një protestë nga kontrollorët e ‘AlbControl’, të cilët kanë firmosur deklaratën e paaftësisë në punë për shkak të stresit të vazhdueshëm që kanë, ndikuar edhe nga pandemia.
