Pesë deputetë të Partisë Socialiste kanë dorëzuar mandatet pasi janë vendosur për të kandiduar si kryebashkiakë. Ata janë Pjerin Ndreu, Ilir Xhakolli, Flamur Golemi, Nuri Belba dhe Rakip Suli.
“Dorëzuam dorëheqjet nga mandati i deputetit! Mirënjohje e respekt për një nga njerëzit më të mirë që pata shansin të takoj në politikë. Komoditeti që të jep Gramoz Ruci është mbështetje dhe inkurajim për të gjithë deputetët. Do na mungojë pjekuria, urtësia, drejtësia dhe korrektesa e tij model”, shkruan Pjerin Ndreu.
Pas dy legjislaturave si deputet, Pjerin Ndreu synon të marrë drejtimin e Bashkisë së Lezhës. I vetmi që është zyrtarizuar për ti dalë përballë në zgjedhjet e 30 qershorit është Eduart Ndocaj.
Ndër 5 deputetët që lanë mandatin për të garuar si kryebashkiakë është edhe Ilir Xhakolli i zgjedhur për herë të parë deputet i Partisë Socialiste në vitin 2013. Ai është konfirmuar për të qeverisur Bashkinë e Pogradecit që është drejtuar nga opozita katër vitet e shkuara. Rakip Suli do të kandidojë në Bashkinë e Kamzës ku ka fituar Xhelal Mziu i Partisë Demokratike tre mandate radhazi.
Në Gjirokastër do të kandidojë deputeti Flamur Golemi, një tjetër bashki e drejtuar nga opozita, konkretisht Zamira Rami e Lëvizjes Socialiste për Integrim.
Në Bashkinë e fituar nga LSI në Përrenjas, socialistët kanë vendosur deputetin Nuri Belba si kandidatin me më shumë potencial për ta drejtuar. Vendin e pesë deputetëve që dorëzuan mandatet do ta zënë pasuesit e tyre në listat përkatëse.
Pjerin Ndreu zëvendësohet nga Adriana Jaku, Ilir Xhakolli nga Ardit Konomi, Rakip Suli nga Eljo Hysko, Flamur Golemi nga Artemis Dralo dhe Nuri Belba nga Florenc Spaho./ Opinion.al
