Këngëtarja Eneda Tarifa u shpall këtë vit fituese e edicionit të radhës të festivalit “Kënga Magjike”. E ftuar në studion e “Opinion” si një nga personazhet e vitit 2019 ajo është pyetur nga drejtuesi i emisionit Blendi Fevziu sesa e vështirë ishte të këndoje në skenën e Këngës Magjike vetëm pak ditë pas tërmetit të 26 Nëntorit.
“E pata të vështirë që në momentin që na u tha që Kënga Magjike do të zhvillohet në të gjithë atë kaos. Unë isha larguar nga qyteti i i Tiranës…Sigurisht që pata frikë janë fenomene natyrore që trembin, nuk janë të kollajta …Unë jam kati i gjashtë dhe vërtet që u tund shumë. Pata shumë vështirësi të këndoja atë ditë, por ky është profesioni ynë. Unë kam zgjedhur të jem këngëtare, nuk kam në dorë të shpëtojë jetë njerëzish, por është një profesion shumë i bukur që e shoqëron dhe e zbukuron jetën e njeriut edhe në ato momente kur mendon se gjithçka është në kllapi. Është pyetja ime e gjithë jetës…kush quhet profesion ai për të cilin ti studion apo ai për të cilin ti investohesh dhe ushtron gjatë gjithë jetës tënde që në këtë sens unë më shumë jam këngëtare, edhe pse kam mbaruar filozofi, një degë që unë kam dashur por nuk mund të jesh filozofe kanë vdekur filozofët, vetëm një njoh unë në Shqipëri që është Artan Fuga. Për më tepër eksperienca dhe bota akademike të bën të arrish drejt filozofisë, por unë nuk besoj që është më një degë është degë luksi i themi ne…Por mua më ka ndihmuar jashtëzakonisht më ka hapur mendjen është fiskultura e mendjes më ka ndihmuar në profesionin tim si këngëtare, si prezantuese gjithashtu,”-u shpreh këngëtarja.
Tarifa ka treguar lidhjen e saj më muzikën, por edhe qasjen e saj drejt prezantimit:
“Kam qenë gjatë gjithë kohës e lidhur, që e vogël me mbledhjet familjare, në dreka në darka ka kënduar kam kërcyer dhe pastaj gjeta rrugën time. Në gjimnaz atëherë kur është vrulli më i madh emocional i njeriut. Sa i përket prezantimit jam munduar që ti bëj të gjitha gjërat që i marr në dorë ti trajtoj si projekte dhe ti bëj mirë ti bëj deri në fund ashtu siç duhet, i futem me kokë dhe mendoj që ja kam dalë ti bëj të dyja. Nëse në muzikë unë nuk do t’ia falja vetes të gaboja një notë ose një mënyrë të kënduari, në prezantim nuk e kam këtë lloj kompleksi jam më e qetë, më e çliruar dhe kjo të jep më shumë lehtësi për të qenë më organike që bën,”-ka përfunduar ajo./ Opinion.al
