Nga Reldar Dedaj
Të gjithë po pyesin së fundi, a ka plasur lufta brenda dy partive kryesore të koalicionit qeverisës PS-LSI? Ka zëra që thonë po.
Akti më i fundit është thirrja publike që ka bërë Petrit Vasili, deputet dhe kryetar i Grupit Parlamentar të LSI-së.
Dy ditë më parë, në një mbledhje urgjente, Vasili thirri deputetë dhe kryebashkiakë të kësaj force politike me temën: Kujdes nga rreziku që kanoset nga Partia Socialiste.
Thënë ndryshe, ai ka paralajmëruar deputetë dhe kryebashkiakë të LSI-së të kenë kujdes me makinat, pasi element të Partisë Socialiste mund të fusin drogë dhe armë brenda tyre.
Kreu i Grupit Parlamentar të LSI-së, tha se ky informacion ka ardhur nga agjensi të huaja, nga ku theksohet se policia mund të fusë drogë dhe armë në makinat e zyrtarëve të lartë të kësaj partie, për t’i akuzuar më pas për trafik droge apo armëmbajtje pa leje.
Thirrja që bën Petrit Vasili, do apo s’do, të sjell në mendje një kërcënim të tipit mafioz; ku njëra palë, kërkon të rrasë në burg palën tjetër.
Duket se në këtë turbullirë dhe luftë maskash, koalicioni qeverisës po humb çdo ditë e çdo stinë. Tani është hapur loja se kush t’i hapë derën burgut. Individët janë zgjuar nga gjumi dhe tanimë s’ka kurrgjë më të rrezikshme se sa dëshira e individit për të mos qenë i mashtruar.
Frika e shprehur nga LSI ka ngjall frikë edhe tek qytetarët e zakonshëm. A mund ta imagjinojë ndokush se si mund të mbrohet një qytetar nga një parti në pushtet, e cila ka batalione të fortësh dhe kriminelësh që mbajnë në duar drogë e armë kundër kujtdo që nuk i pëlqen.
Kreu i LSI-së, Ilir Meta disa ditë më parë i kërkoi presidentit të republikës të mbledhë Këshillin e Sigurisë Kombëtare, me arsyen e moskapjes së trafikantit ndërkombëtar të drogës, Klement Balili?
Duket se marrëdhëniet mes PS-së dhe LSI-së tashmë janë thyer përfundimisht, ashtu si në përrallat me kapërcim të ylberit, fill pas kapërcimit, pra matanë ylberit, ata s’janë më ashtu siç ishin.
Ministri i Mjedisit, Lefter Koka nga një studio televizive njoftoi se segmente të qeverisë janë të lidhur me krimin; se rreziku “vjen nga Partia Socialiste”.
Ndër të tjera, Koka tha se në Durrës është krijuar një bërthamë e mafies nga zyrtarët socialistë.
Mirëpo, ne ende nuk jemi të vetëdijshëm nëse ky është një kushtrim i ri, i sinqertë për një theqafje të mundshme.
Kronika shqiptare rrallëherë jep shembuj të tillë. Ka aq shumë rrëziqe të vërteta sa nuk ka ngelur më vend për ato të rremet.
