‘Personazhi i javës’ do jetë një rubrikë e përjavshme në Opinion.al, e cila do sjellë në fokus, njeriun më të lakuar nga media përgjatë një jave. Për shtatë ditët e para të shtatorit, Opinion.al ka përzgjedhur ministren e Arsimit, Lindita Nikolla. Ministrja Nikolla, kësaj jave, ka qenë personazhi më i përfolur në media për shkak të aplikimit të maturantëve për Universitet, ku procesi i aplikimit ngjalli pakënaqësi dhe revoltë mes studentëve.
* * * *
Nga Reldar Dedaj
Një pasdite vjeshte në Kuvend. Drita e ngrohtë e Tiranës dukej e zbehtë përgjatë bulevardit të madh përballë Kryeministrisë, aty ku dhjetra nxënës protestonin për të drejtën e studimit, e deri në sallën kryesore të Parlamentit. Gjysmat e ndenjësve të anëtarëve të Kuvendit janë bosh. Në podium, në rreshtin e parë të krahut të majtë, pak e kërrusur me një veshje kremoze, xhaketë dhe fund një gisht sipër gjurit qëndronte krejtësisht e heshtur, Lindita Nikolla. Ministrja e Ministrisë së Arsimit dhe gruaja më e përfolur e kësaj jave, po bën çdo përpjekje që të jetë interesante.
Ajo është në qendër të stuhisë për shkak se procesi i aplikimit për programet baçelor ka ngjallur pakënaqësi dhe revoltë mes nxënësve. Historia e kësaj kontradikte, mes ministrisë dhe maturantëve ka nisur si rrjedhojë e aplikimit të tyre për Universitet. Këtë vit, për herë të parë u bë nëpërmjet një sistemi të qendërzuar, të ngritur dhe menaxhuar nga Ministria e Arsimit, përmes të ashtuquajturës Qendra e Shërbimeve Arsimore (QSHA).
Një ditë pas përfundimit të seancës parlamentare në rrjetet sociale spikati një letër e shkruar nga një maturante, ku mes rreshtash, i thuhej: Lindita, shkofsh në djall.
“Ndoshta duhet të të them e “e urryer Lindit”, por detyrohem të mbaj veten sepse s’dua të mërzis, ashtu siç t’i bëre me ne. S’dua të ta thyej zemrën se fundja e jona u thye. I lënduari e kupton të lënduarin”, vijon letra e maturantës.
Një tjetër vajzë i shkruan se a u kënaqe kur pe nxënës që ndiheshin me vlerat në tokë? Ndërsa një tjetër, theksonte: “A u kënaqe kur pe në sytë e tyre dështimin? Çfarë vure re tjetër aty? A pe një vrasje krenarie? Na vratë! Dhe jeni vrasësit e shumë maturantëve që mezi pritën një emër të ngjyrosur me jeshile! Ndërkohë morën një tabelë të stërmadhe me ngjyrën e kuqe të dështimit! Aty thuhej me të madhe se nuk ja dolëm, se na mposhte ti dhe reformat tuaja gjakatare!”.
Andaj, me të drejtë, Ministrja Nikolla është në qendër të gjithë opinionit publik shqiptar, ku jo pak është anatemuar, urryer dhe lançuar si e paaftë për të drejtuar një institucion të tillë. Mosfunksionimi i një reforme arsimore, pamundësia e qindra maturantëve për të mos zgjedhur degën e tyre të preferuar, pavarësisht mesatares së lartë që zotërojnë, e ka shndërruar ministren në personin më të sulmuar, pse jo më të urryer të kësaj jave që kalon.
Sepse, sipas maturantëve, Ministria e Arsimit ka bërë propogandë të vazhdueshme për shumë nisma të ndërmarra prej saj, por ajo nuk ka realizuar asnjë fushatë informimi publik për sistemin e ri të aplikimit. Paçka se në faqen e Ministrisë së Arsimit në facebook, fotoja kryesore e faqes, është ajo e kombëtares së futbollit, në qendër të së cilës është Presidenti i FSHF-së Armando Duka.
Ndoshta në fund të gjithë kësaj stuhie që ka mbërthyer Ministren Lindita Nikolla, me shumë gjasa, vlen t’i thuhet: “Faleminderit që na le me zemër gjysmë! Por të betohemi se s’do të mposhtemi. Të betohemi se do ta mbledhim veten, do i ngjisim gjysmat e ëndërrave dhe do vijmë të të puthim në të dyja faqet”. /Opinion.al/
