Përplasja e bandave të Lushnjës rikthehet në gjykatë.
Prokuroria e Posaçme për Korrupsionin dhe Krimin e Organizuar ka përfunduar hetimet për Orges Bilbilin, Leart Haxhiun dhe Anterio Kaloshin, të njohur si kundërshtarë të Aldo Bares.
Bilbili, Haxhiu dhe Kaloshi akuzohen nga prokuroria për ngjarjen e vitit 2017 në Lushnjë ku mbetën të vrarë dy qytetarë ndërsa objektivi, Xhulio Shkurti, nipi i Aldo Bares, shpëtoi.
Në tetorin e vitit 2017 u vra Jurgen Hoxha dhe Zamir Latifi të cilët u qëlluan me breshri kallashnikovi teksa ishin duke pirë kafe në një lokal pranë “Urës së Përroit”. Objektivi kryesor i sulmit ishte Xhulio Shkurti, i cili vetëm 10 minuta para ngjarjes ishte larguar nga lokali ku po pinte kafe me miqtë e tij.
Sipas Prokurorisë së Posaçme të tre personat kanë vepruar si grup i strukturuar kriminal. Ndaj tyre rëndojnë një sërë akuzash penale si vrasje, grup i strukturuar kriminal dhe armëmbajtje pa leje.
Dosja e tyre do t’i shkojë gjykatës e cila do të vlerësojë në një seancë paraprake nëse akuzat janë të qarta ose jo. Nëse gjykatësit vendosin se akuza e prokurorisë është e qartë atëherë çështja do të kalojë për gjykim në themel.
Përplasjet kriminale në Lushnjë janë rikthyer si pasojë e hesapeve të vjetra të cilat e kanë zanafillën në vitin 1997 kur u krijua banda e Lushnjës e drejtuar nga Alfred Shkurti i njohur si Aldo Bare. Ky i fundit ndodhet prej kohësh i arrestuar dhe vuan dënimin me burgim të përjetshëm për një sërë akuzash të rënda penale.
Laert Haxhiu dhe Orges Bilbili kanë konflikt të hapur me Bandën e Lushnjes dhe kreun e saj Aldo Bare. Me urdhër të tij janë vrarë Luan Bilbili dhe Blerim Haxhiu. I pari xhaxhai i Orges Bilbilit dhe i dyti i afërmi i Lart Haxhiut. Banda e Lushnjes ka kërkuara për të vrarë edhe Shkëlqim Haxhiun, xhaxhain e Laert Haxhiut por nuk ia dolën dhe më pas i dogjën shtëpinë. Në vitin 2005 është vrarë djali i Shkëlqimit pasi ky i fundit rimori lokalin e tij në Lushnje i cili ishte zaptuar nga banda e Aldo Bares./ Opinion.al
