Turqia dëshiron zgjidhjen e mosmarrëveshjeve me Greqinë përmes dialogut, ka thënë ministri i Mbrojtjes i Turqisë, Hulusi Akar.
“Ne duam të arrijmë zgjidhje politike përmes mjeteve paqësore në përputhje me ligjet ndërkombëtare”, tha Akar, për Reuters.
Megjithatë, Akar shtoi se Turqia do të vazhdojë të mbrojë “të drejtat dhe interesat” e saj në ujërat bregdetare.
Tensionet mes dy anëtarëve të NATO-s janë rritur ndjeshëm pasi Ankaraja filloi operacionet e kërkimit të naftës dhe gazit në një zonë të Detit Mesdhe.
Greqia thotë se anija eksploruese e Turqisë, Oruc Reis, po operon në mënyrë të paligjshme në ujëra që janë në sferën kontinentale të Greqisë, akuza të cilat Ankaraja i ka hedhur poshtë.
Anija turke shoqërohet nga disa anije luftarake, ndërsa dhe Greqia ka dërguar luftanijet e saj në rajon.
Sakaq, të premten pritet të mbahet edhe një mbledhje urgjente online midis ministrave të Jashtëm të Bashkimit Evropian të cilët do të diskutojnë për tensionet në rritje mes Greqisë dhe Turqisë./Opinion.al
