Situata e krijuar nga pandemia COVID-19 ngjalli një përplasje të ashpër mes Organizatën Botërore të Shëndetësisë dhe Shteteve të Bashkuara të Amerikës, duke bërë që kjo e fundit të ndërpresë financimet.
Por, disa javë pas ndërprerjes së financimeve të SHBA, Gjermania dhe Franca kanë bërë me dije se do të rrisin kontributin financiar për Organizatën Botërore të Shëndetësisë.
Gjermania premtoi se do të akordojë 500 milionë euro për organizatën, ndërsa Franca 140 milionë të tjera.
Të dy qeveritë deklarojnë se këto financime nuk kanë të bëjnë me vendimin e presidentit Donald Trump për të ndërprerë marrëdhëniet me Organizatën Botërore të Shëndetësisë.
Dy shtetet theksuan rëndësinë që ka mbështetja në këto momente ndaj OBSH, e cila ka një rol thelbësor në përballimin e pandemisë.
Ministri gjerman i Shëndetësisë, Jens Spahn në një deklaratë për shtyp nga selia e OBSH, tha se “Gjermania do të jetë një mbështetëse dhe mike kritike e organizatës”, ndërsa homologu i tij francez, Veran shtoi se “vetëm OBSH është në pozitat për të koordinuar përgjigjen kundër Covid-19”./ Opinion.al
