Kosova nuk do të marrë pjesë në takimin e kryeministrave të vendeve të Grupit të Vishegradit dhe të Ballkanit Perëndimor, i cili do të mbahet të enjten në Pragë. Këtë fakt e ka pohuar Zëdhënësja e Qeverisë në largim të Kosovës, Donjeta Gashi.
Ajo theksoi për Radio Evropa e Lirë, se Kosova është në prag të zgjedhjeve të parakohshme dhe se angazhimet nuk lejojnë pjesëmarrjen në samit të kryeministrit në largim, Ramush Haradinaj.
“Haradinaj e konsideron samitin e Vishegradit si një forum shumë të rëndësishëm, që kontribuon në proceset demokratike, bashkëpunimin dhe kultivimin e vlerave të larta evropiane dhe, për këtë arsye, Kosova do të vazhdojë të jetë pjesë integrale dhe aktive e tij”, -tha Gashi.
Ndërkohë sipas agjencia çeke e lajmeve CTK thuhet se autoritetet e Kosovës e kanë anuluar pjesëmarrjen në samit për shkak të deklaratave të presidentit çek, Millosh Zeman, të bëra në Beograd. Zeman ka thënë se dëshiron të diskutojë me zyrtarët kushtetues çekë mundësinë që të tërhiqet njohja e Kosovës si shtet të pavarur.
Lidhur me këto deklarata të Presidentit çek ka reaguar ministri i Jashtëm i Republikës Çeke, Tomáš Petříček. Ai është shprehur përmes një postimi në “Twitter” se qeveria çeke nuk e ndryshon qëndrimin për pavarësinë e Kosovës.
“Qeveria çeke, e cila është përgjegjëse për politikën e jashtme, nuk e ka ndryshuar qëndrimin e saj për Kosovën ose ndonjë prej shteteve të Ballkanit Perëndimor. Ne do të vazhdojmë të mbështesim dialogun mes Serbisë dhe Kosovës dhe rrugën e tyre drejt Bashkimit Evropian”,- theksoi ai./Opinion.al/
