Mes një përplasjeje me armë mes dy grupesh në Lungomare të Vlorës, një 58-vjeçar u plagos gabimisht.
Dajko Cenodemaj, i cili mori një plumb në këmbë ndodhet jashtë rrezikut për jetën, thotë se fillimisht mendoi që ishin fishekzjarre, dhe vetëm kur hyri brenda në lokal e kuptoi se i rridhte gjak.
“Ne thamë se ishin fishekzjarrë, kur e pamë që ishin armë, qëlloheshin nga të dyja krahët. Edhe nga fuoristrada, edhe ata të tjerët, pastaj po vinin edhe në këmbë disa djem. U futëm të gjithë brenda. Kur u futëm brenda pash gjakun që po më rridhte nga këmbët, aty shoh që kisha marrë plumb në këmbë. Më mori një shokë me makinë me solli në spital”, tregon Cenodemaj.
Ngjarja ndodhi afër mesditës së kësaj të premteje, kur breshëri armësh u dëgjuan në një nga zonat më të frekuentuara të qytetit. Shkëmbimi i zjarrit ndodhi ndërsa mjetet ecnin paralelisht në Lungomare. Më pas makinat u larguan me shpejtësi nga vendngjarja, dhe njëra prej tyre, tip Land Rover u gjet e djegur në Babicë në një zonë të thyer.
Policia vendosi perimetrin e sigurisë në një zonë të gjerë aty ku është edhe një kompleks, në të cilin ka banuar Edison Harizaj, i ekzekutuar disa muaj më parë./Opinion.al
