Gjykata e Tiranës ka ndryshuar masën e sigurisë për 19-vjeçarin, Jehon Breçani, i cili tre javë më parë ka përplasur me makinë Xhesina Gegën, 23 vjeç. Si pasojë e aksidentit e reja humbi njërën këmbë.
Mësohet se gjykata ka ndryshuar masën e sigurisë nga “Arrest në burg” në “Arrest shtëpie” për të riun Breçani.
Ka qenë gazetari Artan Hoxha, ai që ka bërë të ditur lajmin e lirimit të 19-vjeçarit. Sipas tij, ky vendim është marrë për shkak se vetë 19-vjeçari ka pësuar dëmtime nga përplasja e fortë.
“Ka pësuar dëmtime vetë në mushkëri gjatë aksidentit. Ka qenë e nevojshme ndërhyrja mjekësore. Prandaj është ndryshuar masa e sigurisë sepse spitali i Burgut nuk i ka garantuar trajtim mjekësor. Familja Breçani ka sjellë njerëz nga fisi i vet nga Tropoja për të dhënë gjak për 23-vjeçaren e aksidentuar”,-deklaroi Hoxha në abc news.
Aksidenti i rëndë ndodhi më 10 qershor, rreth orës 19:15, në rrugën “Xhanfize Keko”, ku makina luksoze e tipit “Benz”, që drejtohej nga 19-vjeçari, Jehon Breçani, djali i ish-drejtorit të Policisë së Tiranës, Erzen Breçani, ka dalë nga rruga dhe ka përplasur 23-vjeçaren që po qëndronte në trotuar.
I riu Breçani ka humbur kontrollin e makinës dhe është përplasur fillimisht me një mur, më pas me një pemë që e ka thyer dhe më pas ka goditur 23-vjeçaren që ndodhej në trotuar.
Shkak i aksidentit u bë drejtimi i mjetit me shpejtësi tejet normave të lejuara. Përplasja ishte aq e fortë sa Xhesina Gega pësoi dëmtime të rënda në gjymtyrët e poshtme, duke humbur njërën këmbë./Opinion.al
