TIRANE- Një 49 vjeçar, baba i katër fëmijëve, ka ngacmuar për vite me radhë kunatën e tij, duke i kërkuar me ngulm marrëdhënie seksuale. Në të kundërt, ai e ka kërcënuar se do t’i shkatërronte jetën dhe familjen. Historia e pazakontë ka ndodhur në një prej fshatrave të Tiranës gjatë vitit 2014.
Për të kanë pasur dijeni edhe familjarët e 49 vjeçarit Kujtim H. E gjendur nën presionin e vazhdueshëm të bashkëshortit të motrës së saj, që i dërgonte edhe SMS ku i kërkonte seks, e dëmtuara D.M. e ka kallëzuar atë në polici. Pak ditë më parë, Gjykata e Tiranës përfundoi procesin gjyqësor të nisur ndaj tij për akuzën e “ngacmimit seksual”.Ai u shpall fajtor dhe u dënua me 8 muaj heqje lirie. MESAZHET
Referuar kallëzimit të shtetases D.M., kunati i saj, i pandehuri e ka ngacmuar seksualisht që prej muajit mars të vitit 2014. Ajo ka rrëfyer se i pandehuri Kujtim H. i ka kërkuar vazhdimisht që të kryente marrëdhënie seksuale me të, duke i thënë se përndryshe do të shkatërronte atë dhe familjen.
Sipas saj, në 07 tetor 2014, rreth orës 21:58, i pandehuri Kujtim H. i ka dërguar një SMS me tekst: “…moj kurva m… do të q… me zor nesër në pazar. Më kalove nga shtëpija jote. Unë kërkojë të bëjsh atë që dua unë. Tregoja mesazhin burrit”.
Para oficerit të policisë gjyqësore, e dëmtuara D.M. ka sqaruar se pasi ka lexuar këtë mesazh, ka telefonuar djalin e tij, nipin e saj, duke i thënë: “Thuaj babait tënd të mos shkruajë sms në telefon dhe budalliqe, se kam për ta denoncuar në polici”. Edhe pas kësaj telefonate i pandehuri i ka dërguar një tjetër SMS me përmbajtje seksuale të dëmtuarës.
Sipas vendimit të gjykatës, nga këqyrja e rubrikës së mesazheve të telefonit celular të shtetases D.M., në datën 08.10.2014, evidentohen dy SMS të dërguar nga numri telefonik 068…62. Në datën 07.10.2014, në orën 21:58 dhe në orën 22:12 rezultojnë mesazhe me tekst me përmbajtje seksuale.
E dëmtuara D.M. ka pohuar se këto shprehje të dërguara me SMS ia ka thënë dhe direkt asaj në prani të motrës dhe të vjehrrës. ALIBIA Gjatë hetimeve dhe gjatë gjykimit i pandehuri Kujtim H. ka ngritur një alibi, sipas së cilës komunikimet me kunatën i ka pasur për shkak të një borxhi që i kishte dhënë 5 vjet më parë.
Ai ka deklaruar se i ka dërguar mesazhet me atë përmbajtje të kunatës së tij jo për ta ngacmuar seksualisht, por për një borxh prej 5 milionë lekësh të vjetër, që ende nuk ia kishte shlyer. “Ky pretendim i të pandehurit nuk qëndron pasi nga të gjitha mesazhet e dërguara në numrin e saj të telefonit nuk ka shprehje për lekë borxh, por vetëm shprehje të ngacmimit seksual.
Gjithashtu, nga ana e të pandehurit nuk u paraqit ndonjë provë shkresore që të provonte se shtetësja D.M. i ka dhënë lekë borxh”, arsyetonte gjykata në vendim./Panorama/
