Rezultatet e bisedimeve ruso-amerikane në Riad të Arabisë Sauditë, nuk do të bëhen publike. Këtë fakt e ka bërë të ditur zëdhënësi i Kremlinit, Dmitry Peskov në një reagim për mediat.
Rezultatet e bisedimeve ruso-amerikane në Riad i janë përcjellë Moskës dhe Uashingtonit, tha zëdhënësi presidencial rus. Ai theksoi se këto rezultate aktualisht janë duke u analizuar dhe se përmbajtja e tyre definitivisht nuk do të publikohet, pasi kontaktet kanë qenë të natyrës teknike.
“Për sa kaq, nuk ka asnjë plan për të biseduar në nivele të larta delegacionesh. Por siç e dini mund të ngrihet më shpejt një grup tjetër takimi. Ka një mirëkuptim që komunikimi të vijojë, por nuk ka akoma asgjë specifike. Takimi në Riad ishte një takim në nivel teknikësh, sigurisht përmbajtja e këtij takimi nuk do të bëhen publike, pra nuk duhet të pritet gjë për to. Së dyti, siç edhe e kam thënë, raportet e dy kryeqyteteve po analizohen tani dhe më vonë do të flasim”, tha Peskov.
Sipas raporteve të mediave ruse, negociatorët rusë dhe amerikanë kaluan më shumë se dymbëdhjetë orë në Arabinë Saudite duke negociuar një armëpushim të mundshëm në Ukrainë.
Bisedimet supozohej të përqendroheshin në një armëpushim si hapi i parë drejt një përfundimi të mundshëm të luftës së agresionit rus kundër Ukrainës, e cila ka zgjatur më shumë se tre vjet.
Të dielën, negociatorët amerikanë në Riad folën fillimisht me përfaqësues nga Kievi. Presidenti ukrainas Volodymyr Zelenskyy tha se takimi SHBA-Rusi do të pasohet nga një raund tjetër bisedimesh me Ukrainën.
Sakaq, bëhet e ditur se forcat Ajrore të Ukrainës kanë goditur një bazë ushtarake ruse në rajonin Kursk të Rusisë, duke vrarë rreth 30 ushtarë rusë. Këtë e raportoi Shtabi i Përgjithshëm i Forcave të Armatosura të Ukrainës në Telegram. Shtabi i Përgjithshëm shpjegoi se shkatërrimi i kësaj baze ruse zvogëlon aftësinë e rusëve për të kryer operacione luftarake në rajonet Sumy dhe Kursk.
