Kreu i PD Lulzim Basha dhe ish-kryeministri Sali Berisha këtë të diel do të dalin të dy në terren, ku pritet të zhvillojnë takime me demokratët. Takimet do të zhvillohen në të njëjtën orë por në qytete të ndryshme.
Ish-kryeministri Sali Berisha do të jetë në Shkodër, kurse Basha do të jetë në Fier.
Këto takime vijnë pas protestës së 8 janarit para selisë blu, si dhe pas vendimeve të kryesisë së PD për përjashtimin e Berishës nga PD si dhe të 8 anëtarëve të Komisionit të Rithemelimit, të zgjedhur nga Kuvendi i thirrur më 11 dhjetor nga Berisha.
Kujtojmë se për 19 të tjerë, mbështetës së ish-kryeministrit Berisha është vendosur pezullimi nga PD, duke iu dhënë një shans të dytë për të “reflektuar”.
Por përveç përjashtimeve dhe pezullimeve të ardhura si pasojë e asaj që ndodhi më 8 janar, ditën e djeshme në mbledhjen e Këshillit Kombëtar u njoftua se drejtimi i Grupit Parlamentar i ka kaluar Enkelejd Alibeaj, duke u larguar kështu nga detyra Alfred Rushaj, për të cilin u tha se ka dhënë dorëheqjen nga funksionet në PD. Po ashtu vendin e Rushajt si nënkryetar i PD do ta marrë Agron Gjekmarkaj.
Përjashtimi nga PD i Albana Vokshit nga PD, ka bërë që vendin e saj si kryetare e Komisionit të Shëndetësisë ta zërë Grida Duma. Kryetare e Komisionit të Arsimit vu vendos Flutura Açka, e cila zëvendëson Agron Gjekmarkajn. Nënkryetar i Komisionit të Ligjeve u vendos Dhurata Çupi, që zëvendëson Flamur Nokën.
Ndryshime janë bërë edhe në sekretariatet, ku Sekretariati për Buxhetin: Xhelal Mziu (sekretar), Sekretariati për Procedurat, Votimet dhe Etikën: Bledion Nallbati (anëtar), Sekretariati për Statusin e Deputetit: Dashnor Sula (sekretar), Sekretariati për Kërkimin Parlamentar, Bibliotekën dhe Botimet: Lindita Metaliaj (anëtar)./Opinion.al
