Kryeministri Edi Rama në kuadër të fushatës zgjedhore pazhvilluar një takim me qytetarët e Kuçovës.
Rama ka folur në lidhje me përgjimet e publikuara nga gazeta gjermane “Bild”, ku përfshiheshin në biseda zyrtarë të PS dhe Astrit Avdylaj.
Kryeministri tha se përgjimet i janë përdorur për presion politik dhe i janë dhënë gazetarit gjerman për të penguar hapjen e negociatave.
“Dëgjova Prokuroren e Krimeve të Rënda, e cila bëri një panoramë të përgjimeve, është e mjaftueshme për të parë se çfarë ka ndodhur dhe si ka ndodhur. Ndërkohë, kjo çështje duhet të kishte përfunduar dhe çdo fajtor të ishte dënuar. Kjo çështje është mbajtur në sirtar në një ditë të zezë të partisë tjetër, për t’u përdorur si shantazh si muhabete për të çorodituar dynjanë me muhabete që duhen hetuar. Mjafton të dish atë që e dijnë të gjithë. Është nxjerrë dosja për propagandë politike në vend që të hetohen fajtorët. Ajo që është më e rënda është fakti që ky maskarëllëk bëhet jo vetëm për të sulmuar qeverinë po për të përbaltur Shqipërinë në sy të gjithë ndërkombëtare. Gazetës së huaj i kanë shkuar llokum për të penguar hapjen e negociatave. Unë nuk flas për antishqiptarë dhe armiq të brendshëm. Nuk e di nëse ata janë kaq të verbuar, por di se asnjë shqiptar që e do këtë vend dhe shtëpinë e tij pavarësisht se jeton apo jo këtu, nuk duhet t’ia bëjnë këtë Shqipërisë. Këtë asnjë shqiptar i ndershëm nuk duhet t’ia falë. Ne siç kemi bërë dallimin në çdo drejtim do e bëjmë edhe në këtë drejtim”, tha Rama./ Opinion.al E.Xh.
