Kryetari i KED, Ardian Dvorani deklaroi dje se sipas ligjit ai nuk do të mund të ushtrojë funksionin e tij si anëtar i KED nëse do të merrej si i pandehur nga Prokuroria. Megjithatë ai nuk dha një përgjigje direkte nëse kjo do të sillte bllokimin e funksionimit të KED.
I pyetur nga mediat në lidhje me këtë fakt, zëdhënësi i Presidentit, Tedi Blushi tha se kjo është një alibi për ti shpëtuar drejtësisë.
“Kjo është një alibi e neveritshme për t’i shpëtuar drejtësisë për veprat penale që Ardian Dvorani ka konsumuar dhe për të cilat është kallëzuar penalisht në Prokurori”.
Blushi ka shpjeguar më tej se ligji parashikon një mekanizon zhbllokues në rast të mungesës së kryetarit të KED i cili zëvendësohet nga zëvendëskryetari.
“Ligji nr. 115/2016, për funksionimin e Këshillit të Emërimeve në Drejtësi e ka zgjidhur shumë mirë këtë situatë në nenin 227 të tij, ku parashikon se “Anëtari më i vjetër në moshë nga Gjykata Kushtetuese është Zëvendëskryetari i KED-së. Zëvendëskryetari ushtron të gjitha funksionet e Kryetarit në mungesë ose pamundësi të këtij të fundit.”
Zëdhënësi i Presidentit theksoi se funksionimi i KED nuk mund të bllokohet nga përgjegjësia penale e Dvoranit dhe shtoi se ky i fundit është treguar sërish ‘i papërgjegjshëm’ pasi në mbledhjen e djeshme të KED ka njoftuar dy rende dite të ndryshëm duke mos bërë transparencë.
“Nuk është përgjegjësia penale e Ardian Dvoranit, që mund të bllokojë funksionimin normal të KED, por u bllokua qëllimisht funksionimi i KED për dy vite radhazi, që në krye të këtij organi të vihej Ardian Dvorani, për të konsumuar të tilla shkelje të rënda kushtetuese dhe ligjore.
Edhe mbledhja e djeshme e KED-së, e zhvilluar duke njoftuar dy Rende Dite të ndryshme, një të njoftuar publikisht dhe një të ndryshëm të njoftuar anëtarëve dhe pjesëmarrësve në Këshill, është një tjetër e dhënë e papërgjeshmërisë së këtij individi , përkundrejt zbatimit të parimit të transparencës së ushtrimit të detyrës ashtu siç kushtetuta dhe ligji ia kërkon”. /Opinion.al
