Pas përfundimit të drekës së punës që pati me Ambasadoren Amerikane Yuri Kim, kreu demokrat Basha, ka refuzuar të japë komente në media, lidhur me bisedat e zhvilluara në këtë takim.
“Pata një bisedë shumë të mirë me miken tonë, dhe përfaqësuesen e Shteteve të Bashkuara, Yuri Kim”, tha Basha pa thënë detaje.
Takimi i tyre erdhi disa orë para se të zhvillohet manifestimi i thirrur nga Presidenti Meta “në mbrojtje të Kushtetutës kundër grushtit të shtetit”.
Një ditë më parë, kreu i demokratëve konfirmoi përmes një postimi në Facebook, konfirmoi pjesëmarrjen e tij në tubimin e Presidentit por edhe Partia Demokratike doli hapur në mbështetje me anë të një deklarate.
Ky marshim është për shqiptarët ka deklaruar më parë Presidenti Meta duke u përpjekur ta ndajë aksionin e tij nga partitë politike opozitare. Por nga ana e saj Ambasada e Shteteve të Bashkuara e ka cilësuar atë një “tubim politik” ndaj të cilit duhet treguar kujdes nga qytetarët e saj pasi në të shkuarën është përdorur gaz lotësjellës dhe ka patur dhunë.
Pra marshimi i sotëm që pritet të ketë flamuj kuq e zi për SHBA mbetet pjesë e aksionit opozitar kundër qeverisë dhe për këtë ambasadorja ka vendosur të takojë pikërisht kreun e saj.
Lulzim Basha dhe aleatët e tij do të jenë sot të pranishëm në tubimin e Presidentit Meta por ndryshe nga protestat e tjera opozitare ata nuk do të jenë në krye të saj. Nga ana tjetër ata janë edhe pjesë e një tryeze të përbashkët me mazhorancën të cilën Meta e akuzon për “grusht shteti”.
Tryeza për Reformën Zgjedhore pritet që të nxjerrë produktin e saj brenda 15 Marsit dhe kjo do të jetë shumë e rëndësishme për procesin e celjes së negociatave me BE dhe është përkrahur fuqishëm si nga SHBA dhe nga vendet e BE.
Nuk dimë nëse në takimin e sotëm mes Bashës dhe Ambasadores Kim, është diskutuar mbi “Pranverën kuq e zi” apo Reformën Zgjedhore./Opinion.al
