Misionet për kërkim-shpëtimin e personave në rrënojat që la pas tërmeti i 26 nëntorit kanë përfunduar. Bilanci përfundimtar janë 50 viktima duke e bërë këtë tërmet më vdekjeprurësin në Shqipëri.
“Numri i qytetarëve që janë ndarë nga jeta si rezultat i tërmetit ka mbërritur në 50 dhe operacionet e kërkim shpëtimit janë përfunduar.”, deklaroi sot në mbledhjen e qeverisë kryeministri Rama.
Numri më i madh i viktimave është shënuar në Thumanë me 26 ndërsa në Durrës janë shkaktuar 24 viktima.
Kryeministri Edi Rama konfirmoi sot se janë 41 persona që marrin ndihmë në spitale, 34 prej tyre në Qendrën Spitalore të Traumës, 4 në Spitalin e Durrësit dhe 3 janë dërguar për kurim jashtë vendit.
Ndërkohë ende nuk ka një vlerësim zyrtar sa i përket numrit total të godinave të dëmtuara nga ky tërmet.
Në orën 03:54 të mëngjesit të 26 nëntorit Shqipëria u godit nga një tërmet i shkallës 6.4 Rihter i cili shembi disa banesa duke lënë për pasojë viktima. Që prej atëherë Shqipëria është goditur nga një numër i madh paslëkundjesh por orët e fundit kanë qenë shpresëdhënëse pasi numri dhe intensiteti i goditjeve ka ardhur drejt shuarjes. /Opinion.al
