Me të gjitha skandalet e njëpasnjëshme që kanë ndjekur Facebook-un, duket se tashmë po merr atë që meriton. Një studim i ri nga Instituti Reuters i Studimeve të Gazetarisë zbuloi se përdorimi i Facebook-ut për leximin e lajmeve ka rënë. Në vend të saj, njerëzit po kthejnë kokën nga platforma të tjera sociale, si Whatsapp.
Të dhënat e studimit u mblodhën nga vëzhgime e bëra prej YouGov, me një numër të caktuar përdoruesish nga çdo shtet në botë.
Prej punës kërkimore ka rezultuar që në Shtetet e Bashkuara, përdorimi i Facebook për lajme ka rënë në përgjithësi me 6%. Specifikisht, rënia më e madhe është shënuar nga viti 2016 deri në vitin 2018 me 9% në një vëzhgim të përjavshëm, dhe 20% mes përdoruesve të rinj në moshë.
Vendin e Facebook duket se po e marrin platformat sociale me komunikim individual, ose mesazhet në grup. Leximi dhe shpërndarja e lajmeve në Whatsapp është rritur me 4% nga viti 2016 në vitin 2018.
Megjithatë, siç dihet, Whatsapp është nën pronësinë e Facebook, kështu që Zuckerberg është sërish dominant në botën e shpërndarjes dhe leximit të informacionit./Opinion.al
