Dje u bë e ditur se përdoruesit e iPhone dhe iPad kishin rënë pre e një virusi të posa-zbuluar të quajtur “AceDeceiver”, i cili mund t’i prekë pajisjet iOS të cilat nuk janë ‘jailbreak’.
Por, mos u brengosni. Pajisja juaj ndoshta nuk është infektuar me këtë virus.
Sipas një eksperti të sigurisë, Graham Cluley, nëse nuk e keni futur iPhone-in tuaj në Windows PC, atëherë jeni të sigurt, transmeton Gazeta Express.
Kështu, nëse e keni lidhur pajisjen vetëm me një Mac, ose nëse nuk e lidhni fare me kompjuter, mund të mos prekeni nga ky virus i sapo-zbuluar.
Ky virus i Windows vjen nga një program i quajtur “Aisi Helper”, i cili pretendon se është një vegël për të ndihmuar përdoruesit e iPhone dhe iPad që t’i bëjnë jailbreak pajisjet e tyre.
Nëse e keni shkarkuar këtë program, duhet ta çinstaloni menjëherë dhe të ndryshoni fjalëkalimin e Apple ID.
