Të enjten e 11 prillit Julian Assange, 47-vjeçari themelues i Wikileaks, u arrestua në ambasadën e Ekuadorit në Londër, ku jetonte prej vitit 2012 si azilant politik. Ai u arrestua nga policia e Londrës me kërkesë të Departamentit të Drejtësisë të Shteteve të Bashkuara, pasi akuzohet se ka shkelur ligjin e parë kundër hakerave dhe dhunimit të të dhënave informatike, miratuar nga Kongresi i Shteteve të Bashkuara në vitin 1986, ligj që njihet si “Computer Fraud and Abuse Act”.
Akuza nuk bëhet për shpërndarjen e informacioneve nga ana e Wikileaks, por për mënyrën se si janë marrë ato. Këto vite është folur shumë për dënimin që rrezikon Assange, por e vërteta është se bëhet fjalë për një dënim shumë herë më të vogël.
SHBA nuk ka kërkuar arrestimin e Assange për shpërndarjen e dokumenteve të klasifikuara si sekrete nga Shtetet e Bashkuara, pasi në një farë mënyrë mund të konsiderohet si “hulumtim gazetaresk”, as për bashkëpunimin me Rusinë në zgjedhjet e vitit 2016, por për bashkëpunimin me ish-ushtarakun Bradley Manning në hakerimin e një fjalëkalimi që i mundësoi futjen në sistemin informatik të qeverisë amerikane.
Dënimi makismal që mund të marrë Assange, nëse vërtetohet akuza, është pesë vite burg. Në vitin 2010, ushtaraku Bradley Manning u dënua me 35 vite burgim, prej të cilave bëri vetëm 7 dhe më pas mori faljen nga Presidenti Barack Obama./Opinion.al
