Pentagoni ka shkarkuar kolonelen Susan Myers, komandante e Bazës Hapësinore Pituffik në Groenlandë, pas vizitës së nënpresidentit JD Vance dhe përplasjes së saj të hapur me komentet politike të tij gjatë vizitës në bazë.
Sipas një njoftimi zyrtar, Myers u shkarkua për “humbje besimi dhe sigurie”, ndërsa zëdhënësi i Pentagonit, Sean Parnell, shkroi në rrjetin X se “veprimet që minojnë zinxhirin komandues apo që subvertojnë agjendën e presidentit Trump nuk do të tolerohen”.
Incidenti pasoi publikimin e një emaili të brendshëm që Myers kishte dërguar stafit të bazës, ku vë në dyshim deklaratat e Vance, i cili gjatë vizitës së tij kishte akuzuar Danimarkën për dështimin në mbrojtjen e Groenlandës nga “inkursione shumë agresive nga Rusia, Kina dhe vende të tjera”, pa ofruar prova konkrete.
Në emailin e saj, Myers shkruante:
“Nuk pretendoj të kuptoj politikën aktuale, por ajo që di është se shqetësimet e administratës amerikane të shprehura nga nënpresidenti Vance nuk përputhen me realitetin në Bazën Pituffik.”
Groenlanda ka qenë prej kohësh objekt interesimi nga Trump, i cili në të kaluarën ka shprehur publikisht idenë për ta blerë ishullin nga Danimarka për arsye strategjike dhe sigurie. Baza Pituffik, e vendosur në veri të Groenlandës, ka rëndësi kritike për vëzhgimin satelitor dhe sistemet e paralajmërimit të hershëm të SHBA-së.
Pentagoni nuk dha detaje të mëtejshme për sjelljen e Myers, por shkarkimi i saj është pjesë e një spastrimi më të gjerë që ka ndodhur brenda ushtrisë amerikane që prej ardhjes në pushtet të Trump në janar. Ndër të shkarkuarit e fundit janë edhe kryetari i Shtabit të Përgjithshëm, admirali më i lartë i Marinës dhe zëvendësadmiralja Shoshana Chatfield, e cila mbante një pozicion të lartë në NATO.
Shkarkimi i Myers ka ngritur shqetësime mbi ndikimin politik në ushtrinë amerikane, pasi oficerët me uniformë janë të detyruar të qëndrojnë neutralë politikisht dhe besnikë ndaj Kushtetutës, jo ndaj një administrate të caktuar.
