Vijojnë të ashpërsohen rregullat e lëvizjes. Kryeministri Rama ka njoftuar se nga nesër, të gjithë punonjësit e ministrive, bashkive e prefekturave, nga sekretarët e përgjithshëm dhe deri tek i fundit, nuk do të përdorin më makinë për të shkuar në zyrë.
“Nga ky rregull përjashtohen vetëm punonjësit e ministrisë së shëndetësisë, ministrisë së mbrojtjes, ministrisë së financave apo të prefektura e bashkive, që janë të përfshirë në listën prioritare me firmën e titullarit, për të garantuar zhvillimin e luftës sipas planit, në aspektin shëndetësor dhe humanitar”, thotë Rama.
Makinën për të shkuar në punë nuk do ta përdorin as punonjësit e institucioneve të varësisë së administratës qëndrore apo vendore, që e kanë punën në zyrë.
“Titullarët e të gjitha institucioneve të varësisë, duhet të çojnë sot tek ministri apo kryetari i bashkisë, listën e arsyetuar të punonjësve që e kanë të domosdoshme lëvizjen me makinë. emër për emër! Të gjitha listat duhet t’i vihen në dispozicion jo më vonë se ora 23.00 policisë së shtetit” shton kryeministri.
Por ajo që bie në sy në komunikimin e këtyre masave janë dhe ndëshkimet që do të përdoren si garanci për zbatimin e tyre. 3 muaj rrogë do t’i kushtojë kujtdo që thyen këto rregulla dhe në rast përsëritjeje largim nga puna. I njejti penalitet do të vlejë edhe nëse ata shkelin rregullat e reja të lëvizjes së këmbësorëve që Rama komunikoi më parë.
“Sot punonjësi i shtetit që shkel rregullat e luftës në mënyrë të përsëritur, nuk është një kundravajtës si të tjerët, po një dezertor në kuptimin e plotë të fjalës!
Populli nuk i paguan taksat për t’u dhënë rroga atyre që rrezikojnë jetën e tij në këtë luftë ku punonjësit e shtetit duhet të jenë shembulli më kuptimplotë i disiplinës shtetërore dhe përgjegjshmërisë qytetare!
Kjo luftë nuk është lojë! përballë armikut që na ka sulmuar jemi një vend, një popull dhe një shtet! vetëm kështu mund t’ia dalim dhe askënd që s’do të kuptojë nuk mund ta tolerojmë më!” përfundon Rama postimin e tij. /Opinion.al
