Partia Demokratike tërhiqet nga kërkesa e saj për vendet e rezervuara, për katër institucionet e reja të drejtësisë, që pritet të ngrihen pas miratimit të Reformës në Drejtësi.
Burime zyrtare thanë se tërheqja bëhet me qëllim për t’i hapur rrugë gjetjes së një kompromisi mes palëve, për të vetmen çështje që mban peng miratimin në parlament të Reformës në Drejtësi.
Në vend të vendeve të rezervura, për anëtarët e katër institucioneve të drejtësisë, opozita propozon një formulë të re, sipas së cilës, lista e kandidatëve nuk propozohet dhe as nuk verifikohet nga partitë politike.
Formula që demokratët thonë se ia kanë paraqitur maxhorancës prej 17 ditësh, parashikon ngritjen e një komisioni Ad Hoc me 12 anëtarë, 6 nga shumica e 6 nga opozita.
Secili deputet, në mënyrë elektronike do të zgjedhë nga 1 gjyqtar të përzgjedhur më parë nga komisionet përkatëse. Lista me 12 anëtarët, që do të kalojë në komision, më pas do të hidhet si e tërë për votim në parlament, me 2/3 e votave të deputetëve.
Kryetari Basha, pas mbledhjes së grupit dhe një takimi që pati me aleatët e opozitës, ku u vu re edhe prania e kreut të PDK -së Nard Ndoka, tha se kjo nuk është hera e parë që opozita ofron zgjidhje, por është Kryeministri Rama, ai që po synon ta përdorë dështimin e Reformës në Drejtësi për ta çuar vendin në zgjedhje të parakohshme.
Një ditë më parë, ishte maxhoranca ajo që propozi një formulë të re, përmes Kryetarit të Komisonit të Reformës në Drejtësi, Fatmir Xhafaj. Por Basha tha se këtë propozim ia ka rrëzuar me kohë.
Zyrtarisht, Partia Demokratike do ta bëjë publike propozimin e saj të premten e 8 Korrikut. Ndërsa drafti është parashikuar të votohet më 21 Korrik në parlament.
