Partia Demokratike ka denoncuar sërish procesin e votimeve në 30 qershor. Sekretari i përgjithshëm i PD-së, Gazment Bardhi tha se skandaleve të KQZ i shtohet dhe skandali i Vaut të Dejës, ku është votuar me fletë të falsifikuara votimi.
“Duke qenë se materialet zgjedhore u dogjën, KQZ vendosi në 28 qershor nxjerrjen jashtë përdorimit te të gjitha fletëve të votimit, rreth 40 mijë të tilla, të të gjitha materialeve të tjera zgjedhore, përfshirë lista, vula etj. Në orën 07:00 të 30 qershorit, u deklarua se edhe me angazhimin personal të deputetit Tom Doshi, person në listën e zezë të SHBA, gjithçka ishte në rregull, fletët kishin ardhur, materialet zgjedhore gjithashtu, dhe kishte nisur procesi i votimit në të gjitha QV e Bashkisë së Vaut të Dejës. E gjitha është një gënjeshtër. Është mashtrim publik me pasoja të rënda i KQZ. Sipas dokumenteve zyrtare rezulton se Fletët e Votimit në orën 07.58 min të datës 30 Qershor kanë qenë ende në Doganën e Hanit të Hotit”, tha Bardhi, i cili publikoi dhe dokumentin nga dogana.
Akuza të forta sërish hodhi në drejtim të anëtarëve socialistë të KQZ-së. Sipas tij, ky institucion nën urdhrat e Ramës, është përfshirë nga skandali në skandal.
“3 janë skandalet më të mëdha, ku është kapur në flagrance: Falsifikoi dhe manipuloi pjesëmarrjen në votime për llogari të propagandës së Edi Ramës; Falsifikoi rezultatin e votimeve në Bashkinë Elbasan sipas urdhrave te Taulant Balles për të fshehur se për Elbasanin kishte me shumë vota për kandidatin sesa fletë votimi në kuti; Ka lejuar që në Vaun e Dejës të kryhet votim me flete te falsifikuara dhe që nuk i dihet origjina e tyre”, deklaroi Bardhi./ Opinion.al
