Kryeministri i Shqipërisë, Edi Rama ka qenë ditën e sotme për një vizitë në Kolonjë në kuadër të fushatës elektorale.
Rama gjatë fjalës së tij tha se Shqipëria mund të bëhet një kampione e turizmit në Ballkan, teksa i ka cilësuar biznesmenët si aleatët e mëdhenj me të cilët ekonomia shqiptarë do të ngrihet lart e më lart.
Sipas kreut të PS, vetëm partia e tij mund t’ia dalë pasi PD ka dalë me një menu dëshirash ndërkohë që e vetmja gjë që po bën sipas tij është të infektojë njerëzit rrugëve.
”Biznesmenët i shohim si aleatët e mëdhenj, si krahët që do e ndihmojnë ekonominë shqiptare lart e më lart. Infermierët, mjekët e mësuesit nuk i mbron njeri tjetër si PS. Iku koha kur i hidhnin si topa leckash, si njerëz që ishin më pak të aftë që s’kishin as arsim përkatës, por vinin nga rruga e kishin kartat e asaj partie tjetër.
Po interesat e fermerëve kush i garanton më mirë se PS. Mjafton të shikojmë pikat e agroturizmit, ishte fushë e panjohur, ka filluar të jetë embrioni i një industrie të re, fitimprurëse, komplomentare. Shqipëria kampione e turizmit në Ballkan nuk është utopi, por e dukshme e prekshme sa ai dielli që unë shoh tani. Na duhet punë, shumë punë, shumë këmbëngulje për t’i arritur, të jeni të sigurt që do ia arrijmë. Transferojmë qendrat urbane si dita natën. Ça ishte këtu më parë? Një vend nga ku donin të gjithë të iknin, kaloje e s’dije ku të ndaloje. Shumë vizitorë do të vijnë. Kemi rritur eksportet bujqësore. Falë punës së madhe, për të hapur rrugët e ujitjes, që ishin bllokuar nga llumi i dekadave. Vetëm një forcë mund t’ia dalë, PS, të tjerët janë ata që çdo ditë infektojnë. Kanë dalë rrugëve me demek një program, menu dëshirash, je i punësuar po, do të ulim sigurimet, je pensionist, do të rritim pensionin. Dmth ulim prodhimin e qumështit, ngremë atë të djathit. Shëndetësia, do ishim bërë gazi i botës me ato magazina.
Tani duhet të hedhim një hap tjetër të madh.”- tha Rama.
