Deputetja e Partisë Demokratike, Albana Vokshi, të shtunën, është shprehur se Edi Rama përdor kompaninë ‘Fusha shpk’ si një kompani guackë për të pastruar paratë e pista të drogës dhe korrupsionit tek 6 kullat, tre prej të cilave janë parashikuar të ndërtohen në territorin e Teatrit Kombëtar.
Vokshi deklaroi nga selia blu se votimi antikushtetues i Parlamentit për të shembur Teatrin Kombëtar dhe për të grabitur tokën publike është një akt mafioz, nëpërmjet të cilit Edi Rama dhe kompania Fusha do të ndërtojnë 6 kulla në Qendrën Historike të Tiranës.
Ajo tha se pastrimi i parave të pista të drogës dhe korrupsionit është arsyeja kryesore për nxitimin e Edi Ramës për t’a miratuar brenda 5 ditëve me procedurë të përshpejtuar dhe në shkelje të rregullores të ligjeve në fuqi dhe të Kushtetutës, një ligj të personalizuar me emrin e Kompanisë Fusha.
Sipas saj, duke përdorur ‘Fusha shpk’ si kompani guackë për pastrimin e parave të pista të drogës dhe korrupsionit, fitimi minimal për Edi Ramën nga ky akt mafioz, i paprecedentë në historinë e Parlamentit shqiptar është jo më pak se 205 mln euro.
Duke shtuar se pazaret e pista të Ramës me kompaninë Fusha nuk filluan sot dhe me këtë projektligj, pasi historiku i tyre është i pasur dhe asnjëherë i hetuar nga organet e drejtësisë.
“Ishte kompania ‘Fusha shpk’ që Edi Rama ngarkoi për të kryer në të zezë punimet për të shndërruar godinën e Kryeministrisë në një mjedis luksi. Janë rreth 5 milion euro që Fusha shpenzoi në favor të Edi Ramës tek Kryeministria pa asnjë faturë dhe me para që askush nuk ia di burimin, ndërkohë që bizneseve të tjera u tregohet burgu dhe gjoba për mungesën e faturave”,- deklaroi Vokshi.
Më tej, ajo thekson se skema mafioze e pastrimit të parave të pista të drogës dhe korrupsionit nëpërmjet shembjes së Teatrit Kombëtar dhe grabitjes së rreth 8500 metra katrorë pronë publike është e qartë:
- Edi Rama nxjerr jashtë loje Gjykatën Kushtetuese
- Edi Rama përdor kompaninë Fusha shpk për të bërë ofertën e pakërkuar
- Edi Rama miraton ligjin me procedurë të përshpjetuar.
PD për kryebashkiakun Veliaj: Në më pak se 4 vjet, kompania Fusha ka marrë 127 tendera publikë nga Edi Rama, me një vlerë rreth 80 milionë euro.
35 prej tyre, me vlerë 25 milionë euro, Fusha shpk I ka marrë vetëm brenda dy viteve nga Erion Veliaj, sekseri i Edi Ramës në Bashkinë e Tiranës.
Një pjesë e madhe e këtyre tenderave i janë dhënë kompanisë Fusha pa garë.
Nëse do të ishte zbatuar ligji dhe do të kishte fituar kompania me ofertën më të ulët, buxhetit të shtetit do t’i ishin kursyer mbi 6 mln euro. Mjaftueshëm për rikonstruktimin e Teatrit Kombëtar.
Pa garë kompanisë Fusha shpk, i është dhënë ndërtimi i Sheshit Skënderbej, parkingu nëntokësor tek sheshi, që përmbyti veten, Bibliotekën dhe Bashkinë e Tiranës.
Pa garë kompanisë Fusha i është dhënë Bulevardi i Vlorës dhe rikosntruksioni i Ministrisë së Brendshme, e krisur pas tërmetit 5.2 ballësh, të cilit Teatri Kombëtar i mbijetoi.
Edi Rama i dha pak muaj më parë me konçesion kompanisë Fusha ndërtimin me 125 milionë euro të hidrocentralit të Kalivaçit, duke rikonfirmuar lidhjen e ngushtë me kompaninë guackë ku do të pastrojë paratë me ligjin posaçëm të Teatrit Kombëtar.
PD për publikimin e fakteve të reja: Në ditët në vijim, Partia Demokratike do të publikojë fakte të tjera të rënda të kësaj afere korruptive dhe kriminale, që lidh Edi Ramën, Erion Veliajn dhe kompaninë Fusha më botën e krimit dhe drogës.
Për demokratët transparenca e përditshme për këtë akt mafioz që i siguron Edi Ramës pastrimin e pasurisë së tij të paligjshme nga droga dhe korrupsioni do të ndihmojë shqiptarët të marrin vendimin e tyre.
Sepse PD, opozita dhe qytetarët që duan ruajtjen e vlerave kulturore, si pjesë e identitetit tonë europian, qytetarët që duan Tiranën, qytetarët që nuk pranojnë grabitjen dhe qeverisjen nga mafia nuk do të lejojnë triumfin e së keqes!/Opinion.al/
