Numri II i Partisë Demokratike Edi Paloka ka deklaruar se opozita po përgatitet për protesta. Sipas tij qeveria e kapur nga krimi nuk ikën vetë.
“Nuk ka qenie mediokre apo inteligjente në Shqipëri të besojë që gjithçka e ka bërë Saimir Tahiri pa bekimin e Edi Ramës për këtë arsye jemi në këtë situatë, për këtë arsye PD kërkon rrëzimin e kësaj qeverisë dhe krijimin e një qeverie Antimafia. Sigurisht nuk presim që Edi Rama ta bëjë me vullnet te tillë, protestat janë një nga mënyrat që po përgatisim dhe do ta realizojmë. Nuk mund të them afate të përcaktuara se është një proces i tërë që po përgatisim së bashku me opozitën me qëllim që të ketë rezultat final”, shprehet Paloka për “BalkanWeb”.
Sipas tij, qeveria po e mbron krimin dhe se minimalisht pas shpërthimit të skandalit duhet te ishte shkarkuar drejtori i policisë.
“Minimalisht duhet të kishte shkarkuar dhe çuar para drejtësisë Drejtorin e Përgjithshëm të Policisë, me gjithë këto fakte që kanë dalë, me gjithë këto akuza që janë ngritur jo nga opozita, por edhe nga partnerët. Shohim që përveç mbrojtjes që i bëhet krimit dhe mafias me të cilin kjo qeveri ka ardhur dhe mbahet në pushtet nuk ka asnjë reagim tjetër. E thashë, nuk presim reagim, për këtë arsye synimi ynë është rrëzimi i kësaj qeverie. Funksionarë të lartë dhe ish-ministra të tjerë janë të implikuar në raste korrupsioni, kjo është çështje tjetër që lidhet me të tjera informacione me të tjera ngjarje që do vinë më pas”, thekson Paloka.
