Çdo burrë e grua që ka fëmijë në shkollat publike të Tiranës u njoftua dje me urgjencë të dërgojë brenda dy ditëve në shkollë të gjithë të dhënat personale të tyre; si numrin e kartës së identitetit, numrin e telefonit, e-mail, etj. Më herët në fillim të vitit, ishin kërkuar edhe të dhëna të tjera si adresa, vendi i punës i secilit prind, etj. Shumë prindër nxituan ti dërgonin brenda ditës së djeshme të dhënat në shkolla, por Partia Demokratike reagoi ashpër. Ajo tha se numri personal i kartës së identitetit është i panevojshëm, për më tepër që Ministria e Arsimit dhe as drejtoritë e shkollave nuk kishin sqaruar prindërit se për çfarë arsye po mblidhen këto të dhëna. Pas presionit të PD, Ministria e Arsimit doli me deklaratë për mediat, ku dha se është terhequr nga kjo kërkesë. Pra prindërit nuk duhet të dorëzojnë në shkolla kartat e tyre të identitetit!
Por Partia Demokratike, nuk mjaftohet me kaq. Ajo tha sot se tashmë “Nikolla me urdhër të Ramës i ka mbledhur brenda ditës së sotme 70 për qind të kartave dhe këto do ti përdorë për fushatë elektorale”. Albana Vokshi tha se PD do të ndjekë rrugën ligjore duke paditur ministren e Arsimit për shkelje të privatësisë.
Më poshtë dy deklaratat e plota, të PD dhe Ministrisë
Ministria e Arsimit, Sportit dhe Rinisë kërkon të sqarojë komunitetin e prindërve dhe publikun për sa i përket kërkesës për mbledhjen e të dhënave nga prindërit se;
MASR po krijon rrjetin e komunikimit në kohë reale me prindërit dhe mësuesit. Ky sistem do të rrisë transparencën dhe llogaridhënien e stafeve të shkollave kundrejt komunitetit të prindërve të cilët duhet të jenë sa më të përfshirë me sugjerime dhe këshilla duke qenë të informuar për çdo rezultat apo nismë.
Për ta bërë efektiv dhe të sigurt këtë proces, është parë e nevojshme nga specialistët vendosja e Numrit ID si element sigurie, për të shmangur çdo gabim raportimi të të dhënave në emër dhe mbiemër që informacioni të jetë sa më i saktë dhe të shmang dublikimet.
Ministria e Arsimit, Sportit dhe Rinisë siguron se këto të dhëna nuk kanë asnjë qëllim të ndryshëm siç interpretohet nga subjekte të caktuara politike, por kanë një dhe vetëm një qëllim, informimin e prindërve se çfarë ndodh në çdo orë mësimi në çdo shkollë të Shqipërisë.
Theksojmë edhe një herë, se të gjitha akuzat drejtuar këtij procesi janë të ulëta, në rastin më të mirë dhe dashakeqe ndaj institucioneve të dijes ku mësojnë fëmijët e shqiptarëve.
Për të shmangur spekulimin politik me këtë detaj që është vetëm teknik, Ministrja e Arsimit, Sportit dhe Rinisë znj. Nikolla ka nxjerr urdhër për heqjen e kësaj kërkese.
Do të vijojmë më ngritjen e rrjetit të bashkëqeverisjes me prindërit dhe mësuesit edhe në mungesë të elementit NID.
Partia Demokratike
Për të dhënat e komunikimit në kohë reale me prindërit mjafton numri i telefonit ose email i vetëm një prindi.
Numri i kartës së identitetit të prindërve, mund t’u duhet për identifikim në zgjedhje, por jo për komunikim në kohë reale.
Tërheqja e Lindita Nikollës, nëse është e vërtetë, është e pamjaftueshme!
Ministrja e Arsimit duhet të tregoje se përse gjeti një mekanizëm të paligjshëm që të sigurojë brenda natës numrat e kartave të identifikimit të të pakten 70% të shqiptarëve, pra të babait dhe të nënës së cdo fëmije që ndjek shkollën.
PD u bën thirrje edhe një herê prindërve të mos japin të dhênat e tyre personale tek një bande që do t’i përdorë ato për qëllime elektorale!
Partia Demokratike po e ndjek me ekspertët e saj këtë cështje dhe siguron Ministren Nikolla se do të përballet me drejtësinë për shkeljen flagrante të ligjit!
