Është prishur seanca plenare paraditen e sotme në parlamentin shqiptar. Opozita mbajti të bllokuar foltoren ndërsa kryetari Gramoz Rucci që kishte njoftuar rinisjen e seancës për në orën 13:00 e shtyu sërish atë në orën 18:00 pasi opozita nuk lëviz nga foltorja.
Edhe në këto momente, gazetarët që ndjekin punimet e Kuvendit raportojnë se deputetët e PD nuk po lëvizin nga foltorja.
Përjashtimi i Bashës
Kryetari i Partisë Demokratike, Lulzim Basha është përjashtuar nga punimet e seancës së Kuvendit për 10 ditë, pas dy vërejtjeve dhe paralajmërimeve të kryetarit të Kuvendit, Gramoz Ruçi. Shkak për këtë masë është bërë pasi kryetari i PD bllokoi foltoren e Kuvendit, pas vendimit me shumicë votash të mazhorancës, për të shtyrë diskutimet dhe ngritjen e komisionit të reformës zgjedhore seancën e ardhshme parlamentare.
Seanca shtyhet 4 here
Seanca nisi me debate dhe shkak për këtë u bë projektvendimi për ngritjen e komisionit të reformës zgjedhore. PD kërkoi të bëhej debat fillimisht dhe më pas të shkohej në votim për miratimin e komisionit. Ndërsa nga ana tjetër, LSI insistoi për shtyrjen e seancës pasi nuk ishte njohur me projektvendimit, qëndrim i cili mori dakordësinë e socialistëve.
Edmond Spaho u shpreh “brenda ditës së sotme të përgatitemi për të diskutuar dhe brenda orës 16:00 të rifillojë seanca”, ndërsa Taulant Balla kundërshtoi: “Kjo çështje s’duhet të ketë debat sepse ka kaluar me konsensus. Prandaj ta shtyjmë këtë pikë të rendit të ditës dhe kjo çështje të kalojë seancën tjetër”.
Më pas reagoi ashpër Lulzim Basha. Nga foltorja e parlamentit ai deklaroi: “Ky biçim parlament po degradon, sot ne rend dite kemi cështjen e zgjedhjeve, opozita ka depozituar kërkesën për debat me emrat e folësve ju vini të papërgatitur për debat se nuk e doni debatin, për t’i mbyllur gojën opozitës me kartona, mblidh konferencën e kryetarëve tani, opozita e ka bërë kërkesën pro rregullores, ky parlament s’është pronë e mazhorancës, as e jotja, prandaj ndërpre tani seancën, konstato kush ka përgjegjësinë për këtë problem.
Keni lepurin në bark, jeni në hall me “rrugën e Elbasanit”, mblidh Konferencen e Kryetareve ose bëhu përgjegjës për bllokimin total të punimeve të këtij parlamenti, vendos për një afat të arsyeshëm debati, s’mund të shtyhet me një javë, ne kemi kërkuar orën 4, por kjo seancë s’mund të procedojë në shkeljen e rregullave”, tha Basha.
Pas deklaratës së Bashës, kryeparlamentari Gramoz Ruçi tha se vendimin e merr Kuvendi. “Ne duam diskutime. Tjetër gjë do ishte të moslejonim diskutimet. Kjo çështje është kompetencë e seancës dhe kjo çështje e mbyllur”, tha Ruçi. Sakaq Ruçi i tërhoqi vërejtje kryetarit të PD, Lulzim Basha i cili nuk lëshoi foltoren pasi u shpreh kundër shtyrjes së seancës për javën e ardhshme lidhur me ngritjen e komisionit të reformës zgjedhore.
Basha akuzoi Ruçin se do mbajë përgjegjësi për shkeljen e rregullores së Kuvendit, por Ruçi i i tërhoqi vërejtje, ndërsa ndërpreu seancën për 5 minuta.
Edhe pas rinisjes së seancës Basha ishte në foltore dhe nuk pranoi ta lëshojë atë. Pas dy vërejtjeve të njëpasnjëshme, Ruçi i komunikoi përjashtimin nga seanca për 10 ditë. Kjo ishte masa e parë ndëshkimore e kryetarit të Kuvendit pas zgjedhjes së tij në këtë dytë në fillim të shtatorit.
Ndërsa në orën 13:00 kur Ruçi dhe deputetët e PS u rikthyen në Parlament, por deputetët e PD qendronin në foltore pa lëvizur që prej orës 11:00.
Duke qenë se demokratët nuk pranojnë ndëshkimin e liderit të tyre, pra perjashtimin nga punimet e parlamentit vazhdojne te mbajnë të rrethuar foltoren. Ruçi njofton shtyrjen e seancës plenare deri në orën 18:00 te dites se sotme.
