Enkelejd Alibeaj, ka prezantuar ditën e sotme krijimin e Këshillit Euroatlantik, një organ këshillimor pranë Partisë Demokratike.
Sipas Alibeajt, kjo nismë do ta kthejë PD në një alternativë qeverisëse për të nesërmen.
“Sot është një ditë e rëndësishme për mua personalisht, për Partinë Demokratike , për rrugën tonë të përbashkët dhe të ardhmen e kësaj partie. Sot ,ne ndërmarrim një nismë , e cila është një hap tjetër për të garantuar ecurinë e Partisë Demokratike drejt vlerave dhe parimeve për të cilat ajo u formua dhe mbi të cilat do të vazhdojë rrugëtimin e saj politik edhe në të ardhmen.
Një nismë ,e cila do t’i shërbejë Partisë Demokratike në sfidat dhe betejat politike që ajo ka përpara në funksion të një Partie më të fortë, më të sigurt dhe më të bindur drejt të ardhmes së saj. Për t’i dhënë Shqipërisë një të djathtë moderne, një forcë politike që ka në themel të saj lirinë, shtetin e së drejtës dhe demokracinë, që ka në themel të saj vlerat perëndimore dhe euroatlantike. Një Parti Demokratike pra, që do të jetë padyshim alternative qeverisëse e së nesërmes dhe për të cilën Shqipëria ka kaq shumë nevojë.
Për të gjitha këto arsye, me qëllim realizimin e objektivave tona të përbashkëta, në cilësinë e Kryetarit të Partisë Demokratike dhe kompetencave që më jep statuti i saj, kam kërkuar formimin dhe ngritjen e një organi këshillimor, i cili do të quhet Këshilli Euroatlantik pranë Partisë Demokratike.
Këshilli do përbëhet nga këta anëtar :
Edmond Trako –Deput i PD në legjislaturën e parë
- Eduard Prodani –Student i Dhjetorit, bashkethemelues i forumit rinor të PDSH
- Fatos Hoxha –ish-deputet i PD 2009-2013
- Gjergji Hani –ish i dënuar politik në moshën 16-vjeçare në 1985
- Marcel Hila –Aktivist i degës se Partisë Demokratike Shkodër qe ne vitin 1990
- Neli Demi –psikiatër, terapist
- Nevila Nika – Profesoreshë, historiane, ish-drejtoreshe e Arkivit të shtetit
- Omer Stringa –profesor i ekonomisë, ish-dekan i fakultetit ekonomik
- Preç Zogaj –themelues i Partisë Demokratike, drejtor i gazetës së parë opozitare RD
- Rushdi Keci –profesor, ish Prefekt i Tiranës
- Vasil Gjika –ish deputet i PD-së ,92-96”, tha Alibeaj.
Sipas tij, ky këshill do të ketë si funksion këshillimor për sa i përket vendimarrjeve, linjës dhe orientimit politik të PD.
“Ky këshill, do të ketë funksion këshillimor për sa i përket vendimarrjeve, linjës dhe orientimit politik të Partisë Demokratike. Gjithashtu Këshilli dhe anëtarët e saj do të kenë autorizimin e Partisë Demokratike të shpërndajnë kudo që munden, në media, ne forume apo tavolina të ndryshme diskutimesh vlerat e Partisë Demokratike, kauzat e saj politike dhe orientimin e saj properëndimor”, shtoi ai./Opinion.al
