Partia Demokratike kërkoi shkarkimin e kreut të ri të Akademisë së Shkencave. Ndërsa kjo forcë politike ishte kundër mënyrës së si Skënder Gjinushi u zgjodh në krye të Akademisë, pas fyerjeve që ai bëri ndaj gazetares kërkon shkarkimin e tij.
“Gazetarja Enkelejda Mema, u intimidua, u fye dhe u ngacmua seksualisht nga Skënder Gjinushi, gjatë një transmetimi live, pak minuta pas zgjedhjes Kryetar i Akademisë së Shkencave, me votë të urdhëruar direkt nga Kryeministri Edi Rama. Në një vend normal, demokratik, Skënder Gjinushi sot, nuk do ishte lejuar të hynte në Akademi. Ministër i diktaturës, me fjalor dhe akte perverse si sistemi diktatorial që i prodhoi, nuk mund e nuk duhet të jetë as anëtar, e jo më të drejtojë Institucionin më të lartë shkencor në Shqipëri”, thekson PD.
- LEXO EDHE- Gjinushi–gazetares: Je e eksituar, vizitohu
Nga ana tjetër për të ka reaguar dhe Rudina Hajdari. Në një status të gjatë të Facebook, ajo shkruan se “I paligjshëm nga takat e këpucëve deri te flokët ai uzurpoi A.SH. si kryetar partie politike nëpërmjet një truku me K.M, duke i falur atij partinë per zgjedhjet e 30 Qershorit dhe Rama i fali akademinë e paralizuar me anëtarë me statuse joligjore, si çerdhe e shkaterrimit të historisë dhe albanologjisë, per të mos përmendur shkencat inekzistente të sakta”.
Por këto reagime dhe jo vetëm nuk e ndalën zotin Gjinushi të pinte kafe i pa shqetësuar me kryeministrin Edi Rama gjatë kësaj të shtune në një nga lokalet e kryeqytetit. (LEXO LAJMIN KËTU)
Në një vend normal pas atyre deklaratave tepër të rënda ndaj gazetares, minimumi që duhet të bënte një akademik ishte të kërkonte falje publike. Por deri tani ai ka heshtur, ashtu si dhe për garën pa konkurrencë që u zhvillua në Akademinë e Shkencave./ Opinion.al
